Një natë me shkrimtarin e njohur; Nikolaidis: Nuk ndihem aspak i lirë në këtë Mal të Zi të çliruar

Mbrëmë në Qendrën për Kulturë të Cetinjës u mbajt manifestimi “Një natë me shkrimtarin e djegur”, duke mbledhur Andrej Nikolaidis por edhe të ftuar të tjerë.

Të ftuar ishin Olivera Komar dhe Boban Batricevic, ndërsa Dushan Pajoviç, një aktivist dhe shkrimtar i majtë, moderoi aktivitetin. I ftuar surprizë ishte gazetari Dragan Bursac.

Veprimtaria iu kushtua rrethanave të veçanta të një prej shkrimtarëve dhe kolumnistëve më të njohur në Mal të Zi.

“Ju nuk e shihni shpesh veten duke u djegur në sheshin qendror. Nuk ka ndodhur rastësisht, e kam merituar me mundin tim. Më vjen shumë keq për të gjithë ata njerëz, sepse ata i bënë një dëm të madh si vetes, ashtu edhe qytetit. Ai qytet e deklaron veten si qyteti i artistëve dhe shkrimtarëve, ndërsa ata dogjën një. Më vjen keq për njerëzit që kanë shkruar fjalimin, pasi përhapin gënjeshtra,” tha z. Nikolaidis.

Sipas profesorit të filozofisë, kolumnistit dhe gazetarit, Dragan Bursac, nacionalizmi i Serbisë së Madhe shënoi autogol me këtë lëvizje.

Një profesoreshë në Fakultetin e Shkencave Politike të Universitetit të Malit të Zi, Olivera Komar, tha: “Është viti 2024, Mali i Zi, dhe ju mund të shihni një zjarr të madh që djeg shkëndija të nxehta dhe disa njerëz që mbajnë çarçafë mbi kokë, me vrima për sytë. Është një skenë që vështirë se mund ta diskutosh.”

Kur doni të asimiloni një komb, gjëja e parë që bëni është t’i merrni burimet e tij, kjo është më e rëndësishmja – vuri në dukje një profesor në Fakultetin e Gjuhës dhe Letërsisë Malazeze, Boban Batricevic.

Në natën finale të Festivalit të 55-të të Mimozës, organizatorët dogjën një figurë të Andrej Nikolaidis.

“Nuk ndihem aspak i lirë në këtë Mal të Zi të çliruar. Cetinja është i vetmi qytet që më ftoi të lexoj dhe të flas për herë të dytë. Ndihem i lirë në Ulqinin tim, në Cetinje dhe mund të arrij pa frikë në Plavë, Rozhajë, Gusinjë. Kjo është ajo”, theksoi z. Nikolaidis.