Ati i Shenjtë dhe Patriarku i Moskës, dy mesazhe për agresionin rus në Ukrainë

Mesazhet për pashkë kanë vënë në dukje diferencimet mes të krishterëve ortodoksë dhe atyre katolikë në lidhje me luftën në Ukrainë. Ndërsa Papa Francesku bën ftesë për paqe dhe sugjeron që të burgosurit rusë dhe ata ukrainas të kthehen në shtëpitë e tyre, patriarku rus Kirilli (që disa vite më parë ishte në Shqipëri) e nxit luftën duke e quajtur atë “të shenjtë”.

Dokumenti që e konsideron pushtimin e Ukrainës nga Putin një “Luftë të Shenjtë” u miratua në kongresin e Këshillit Popullor Botëror Rus, në të cilin figura fetare, politike dhe kulturore u takuan në vendin e Katedrales së Krishtit Shpëtimtar në Moskë, një pikë qendrore për besimin ortodoks në Rusi.

Kreu i Kishës Ortodokse Ruse, Patriarku Kirill, gjithashtu kryeson këshillin dhe është aleat i Putinit. Ai është kritikuar për ofrimin e një justifikimi fetar për luftën dhe pasi nuk ka dënuar vrasjen e njerëzve në Ukrainë.

“Nga pikëpamja shpirtërore dhe morale, operacioni ushtarak special është një luftë e shenjtë, në të cilën Rusia dhe populli i saj, po mbrojnë hapësirën e vetme shpirtërore të Rusisë së Shenjtë”, thuhet në dokumentin e publikuar të mërkurën nën titullin “operacion special ushtarak”, i cili është termi zyrtar i Kremlinit për pushtimin.

Ai vazhdoi të pretendonte se lufta kishte për qëllim “të mbronte botën nga sulmi i globalizmit dhe fitorja e Perëndimit, i cili ka rënë në Satanizëm”.

Pas luftës, “i gjithë territori i Ukrainës moderne duhet të hyjë në zonën e ndikimit ekskluziv të Rusisë”, tha ai.

I ndryshëm nga Kirilli, ka qenë mesazhi i Papa Françeskut në mesazhin e Pashkëve “Urbi et Orbi”, që u përshëndet me duartrokitje në sheshin e Shën Pjetrit.

“Ndërsa bëj thirrje për respektimin e parimeve të së drejtës ndërkombëtare, shpresoj për një shkëmbim të përgjithshëm të të gjithë të burgosurve midis Rusisë dhe Ukrainës: të gjithë për të gjithë! Për më tepër, unë bëj thirrje edhe një herë për akses të garantuar në ndihmën humanitare në Gaza, duke kërkuar edhe një herë një lirimi i pengjeve të rrëmbyer më 7 tetor dhe një armëpushim i menjëhershëm në Rrip”, tha Papa.

Të pranishëm në sheshin e Shën Pjetrit ishin 60 mijë besimtarë, sipas Zyrës së Shtypit të Selisë së Shenjtë.

“Të mos lejojmë që armiqësitë e vazhdueshme të vazhdojnë të kenë pasoja të rënda mbi popullatën civile, tashmë të rraskapitur dhe mbi të gjitha mbi fëmijët. Sa vuajtje shohim në sytë e fëmijëve. Fëmijët në ato vende lufte kanë harruar të buzëqeshin. Me vështrimin e tyre ata pyesin: Pse? Pse kaq shumë vdekje? Pse kaq shumë shkatërrim? Lufta është gjithmonë një absurditet dhe një disfatë! Të mos lejojmë që erërat më të forta të luftës të fryjnë mbi Evropën dhe Mesdheun. Le të mos dorëzohemi para logjika e armëve dhe riarmatimit. Paqja nuk ndërtohet kurrë me armë, por duke zgjatur duart dhe duke hapur zemrat”, shtoi Ati i Shenjtë në mesazhin e tij.

Siç shihet, diferenca mes dy kishave nuk është vetëm për datën e pashkëve, ku një e feston më parë, e një më vonë. Dallimet janë edhe tek roli që duhet të ketë feja në shoqëri, ku njëra palë preferon të bëhet megafon i pushtetit, ndërsa pala tjetër ruan një pozicion më neutral dhe mjaftohet me thirrjet për paqe.

Dokumenti/Vizita e patriarkut të Moskës në Shqipëri dhe dyshimet si agjent i KGB

Sanksionet e BE nuk kursejnë as patrikun e Moskës, i ftuar special i kishës joautoqefale shqiptare