“TEMPULLI QË NA MËKOI DHE NA BEKOI ME DIJE PËR JETËN”

Në kohën e rinisë sonë ishte vlerësim i gjithëpranuar se Gjirokastra magjike kishte dy kështjella: 1. kalanë hijerëndë mesjetare, si simbol të qëndresës, 2. liceun, gjimnazin “Asim Zeneli”, i cili konsiderohej “Tempull i Dijes”, jo vetëm prej ndërtesës impozante, por sidomos prej trupës pedagogjike cilësore dhe niveli i lartë i mësimdhënies.

Në nëntorin e vitit të kaluar ishte 100-vjetori jubilar i atij gjimnazi, i cili meritonte një kremtim dinjitoz, por mosvlerësimi apo injorimi prej institucioneve qendrore të shtetit ishte mjaft zhgënjyes. Kremtimi i jubileut të gjimnazit shekullor u organizua vetëm nga pushteti lokal, sikur ai gjimnaz të mos kishte vlera të veçanta me karakter kombëtar në të gjitha fushat e jetës. Ai gjimnaz i ka dhënë Atdheut jo vetëm qindra personalitete të shquara të dijes, shkencës e kulturës , por edhe rreth 150 luftëtarë për çlirimin nga okupatori nazi-fashist, një e treta e të cilëve dhane jetën për liri. Fatmirësisht në ceremoninë e organizuar nga pushteti vendor me rastin e 100-vjetorit të gjimnazit u akordua titulli “Qytetar Nderi” për dy prej mësuesve legjendë të atij gjimnazi, Luis Çene dhe Agim Shehu. Ne ish gjimnazistët, propozues për titullin, i jemi falenderues Kryetarit të Bashkisë dhe Këshillit Bashkiak të Gjirokastrës.

Ideja për botimin e një libri me mbresa e kujtime kushtuar gjimnazit emblematik të Gjirokastrës lindi prej një grupi të vogël ish-gjimnazistesh rreth një vit para 100-vjetorit të tij, jo vetëm si një dëshirë nostalgjike, por sidomos si një obligim. Megjithëse përgatitja e librit u realizua në kohë, botimi i tij nuk u bë i mundur në prag të festës jubilare për arsye financiare, megjithë premtimet e Bashkisë Gjirokastër. E rëndësishme është që më në fund u realizua. “Më mirë vonë se kurrë”, thotë populli. Si antar i grupit përgatitës të botimit falenderoj zotërinjtë Ilir Babaramo e Alket Veliu, të cilët me dashamirësi mundësuan botimin e librit

Libri është një mozaik shkrimesh që karakterizohen si nga elemente të përbashkët ashtu edhe nga elemente të ndryshëm. E përbashkëta e shkrimeve është se ato kanë të njëjtin objekt: gjimnazin “Asim Zeneli”, si dhe i përkasin të njëjtës moshë, moshës së bukur rinore të gjimnazistit. Libri karakterizohet gjithashtu edhe nga e ndryshmja sepse mbresat e kujtimet janë shkruar nga ish-nxënës të gjimnazit tashmë me mosha të ndryshme, me kënd-vështrime të ndryshme, si dhe pasqyrojnë periudha të ndryshme në kohë.

Le të jetë ky libër një kontribut modest me mbresa e kujtime të disa prej ish-nxënësve për “tempullin e dijes”, gjimnazin “Asim Zeneli” të Gjirokastrës.