Zana Tako: Dëshira…

 

Puhizë shikimi yt,

tretet brenda diellit,

vezullon yjesh,

e shndrin në gji të hënës.

 

Jep e merr

e fjala nuk merr udhë.

Liria e saj ndalet

në pragun e dëshirës,

kërkon fllad të shlodhet,

e ujë burimi të freskohet.

 

Merre shtruar moj dëshirë,

se ujët e burimit nuk shterron.

Ngopesh e ndjen etje përsëri,

burim që pret e përcjell plot dashuri.

 

Vërtitesh rreth tij,

e të largohesh nuk bën dot,

dëshirat kthehen në lumenj,

që drejt shtratit vrapojnë.

 

Veç një dëshirë,

nuk e le të shkojë ti,

por e mban si një vashëz,

plot hir e bukuri.

 

Stolisur burimi,

plot nur e hijeshi,

ku gjallojnë e shndrisin,

miliona dëshirëza shpirti….

2 Korrik 2024.