Cikël poetik nga Avdush Canaj

 

 

PIKTUROJMË NË VARGJE

 

Ti mbledh ëndrrat

e luleve

unë cicërimat

e pemëve

bashkë i pikturojmë

në vargje

me lapsin

e gushëkuqit

t’ua lexojmë

fluturave

në tangon e mëngjesit.

 

E KARAMELTA

 

Ti s‘ke lindur në spital,

sigurisht

në fabrikën e çokollatave

të ka gjetur mami ty,

prandaj je e ëmbël,

krejt ëmbëlake,

e karamelta ime!

 

PJESHKËT

 

Nganjëherë

edhe pjeshkët gabojnë

kur i bëjnë detyrat

Gabimet

i kanë të ëmbëla

si buzëqeshja e qerpikëve

Dielli s’ua ul notën

në ditarin e degës.

 

NË SYTË E TU

 

Në sytë e tu

prej deti

lundrojnë

përditë

anijet me përqafime.