Kinezja Can Xue, favorite për të fituar Nobelin e Letërsisë për vitin 2024

Can Xue, Haruki Murakami, Margaret Atwood, César Aira, Gerald Murnane dhe Thomas Pynchon janë ndër autorët që kanë më shumë gjasa të fitojnë çmimin Nobel të letërsisë këtë vit. Autorja e avangardës kineze Can Xue, 71 vjeç, është favoritja e Ladbrokes për të fituar, me shanse 10/1. Ajo ishte gjithashtu favoritja për të fituar çmimin e vitit të kaluar, i cili në fund iu dha shkrimtarit norvegjez Jon Fosse.

Të shkruash është si të pish – e bëj për të hequr qafe veten

Fituesi i çmimit Nobel Jon Fosse: “U deshën vite para se të guxoja të shkruaja përsëri”. Marrësi i çmimit 2024 do të shpallet të enjten në mesditë BST dhe do të marrë 11 milionë korona suedeze (811,780 £). “Gara e këtij viti për çmimin Nobel është ende e hapur dhe ndërsa ne kemi parë interes të madh për Gerald Murnane dhe César Aira, është Can Xue ajo që mbetet zgjedhja më e njohur me lojtarët dhe vazhdon të kryesojë bastet si rezultat”, tha Alex Apati i Ladbrokes.

Can Xue, emri i vërtetë i së cilës është Deng Xiaohua, ka qenë dy herë në listën e gjatë për çmimin ndërkombëtar Booker me romanin e saj ‘Dashuria në Mijëvjeçarin e Ri’ – përkthyer nga Annelise Finegan Wasmoen – dhe për përmbledhjen e saj me tregime të shkurtra ‘I Live in the Slums’, përkthyer nga Karen Gernant dhe Chen Zeping.

Ajo ka lindur në vitin 1953 në Changsha, provincën Hunan. Gjatë Revolucionit Kulturor, prindërit e saj u detyruan në punë fizike në fshat. Arsimin e saj formal e përfundoi me shkollën fillore. Nëse ajo emërohet laureate Nobel, ajo do të jetë gruaja e 18-të që fiton çmimin, fituesja e tretë kineze dhe vetëm e dyta me banim në Kinë pas Mo Yan, i cili e mori atë në 2012. Pas Can Xue me shanse 14/1 është shkrimtari japonez Murakami, i cili ka shkruar më shumë se një duzinë romanesh – duke përfshirë ‘Drurin Norvegjez’, ‘Kafka në breg’ dhe ‘1Q84’ – si dhe koleksione me tregime të shkurtra dhe jofiction.

Atwood dhe Pynchon kanë të dy shanset 16/1. Atwood – autorja kanadeze e “The Handmaid’s Tale” dhe i romaneve fitues të Booker “Testaments” dhe “The Blind Assassin”, së bashku me shumë romane të tjera, koleksione poezish dhe vepra jo-fiction – është konsideruar prej kohësh një pretendente për çmimin. Në vitin 2017, Kazuo Ishiguro, i cili fitoi atë vit, i kërkoi falje Atwood: “Me të vërtetë mendova se ajo do ta fitonte shumë shpejt”.