NË TEATRIN KAMERTAL TË KOLEGJIT AAB MBAHET “ORA E SHKRIMTARIT” ME POETIN LULZIM TAFA

E organizuar nga PEN Qendra e Kosovës, në Teatrin Kamertal të Kolegjit AAB është mbajtur “Ora e Shkrimtarit” me poetin Lulzim Tafa.
Aktiviteti u moderua nga profesori dhe shkrimtari Sali Bashota, i cili vlerësoi lart krijimtarinë artistike të poetit Tafa, duke ndarë me të pranishmit pjesë nga biografia dhe veprimtaria e tij e bujshme në fushën e poezisë.
“Ora e Shkrimtarit” u fokusua në diskutime të rëndësishme që përfshinin poezinë dikur dhe sot, lexuesit, efektin dhe veçori të tjera që bart ndër vete.
Poeti Lulzim Tafa, përveçse deklamoi disa nga poezitë e tij më të njohura qysh nga fillet e krijimtarisë dhe deri tek ato më të fundit si “Vdekja e të paqenës”, ndau rrëfime dhe histori me të pranishmit për hapat e parë kundrejt poezisë, bashkë me pasionin që ka për të sjellur vargje të cilat do i rezistojnë kohës.
Ai tregoi për takimet e tij të para me poetë të njohur si Vehbi Kikaj, Ali Podrimja, Azem Shkreli dhe shumë të tjerë që në mënyrë të pashmangshme kanë lënë gjurmë në letërsi.
Në fund të aktivitetit studentët parashtruan pyetje për poetin Tafa, të ndërlidhura me ndikimin e poetëve botëror në poezitë e tij, këshilla për lexuesit e rinj, figurat e fjalëve dhe shprehjeve të përdorura brenda vargjeve, etj.