Mimoza Bici: A e din ti se kush jam?

A e din ti se kush jam?

Sigurisht e din

Nëse shikon një grua hije fytyrvrarë,

kalimtare zakonshme,

e përbrenda ndjen trazir’:

Kush dreqin bie dashuri me këtë!

ke prekur tokën, po fle joshjeve të dritës,

vajzës peri,

lakmisë së parasë,

pushtetit

dhe gjithçka që afron ky gjumë sa i rendomtë

aq lajkatar.

Je fitimtar

nëse arrin gjithçka që mund të arrihet përgjumjes…

Kushdo do dëshironte një fund të tillë.

*

Tani jam po unë,

këtë herë kuruar sharmit të bukurisë

Disa syre nuk ngurruan komplimentat se do falnin gjithë sa kishin, edhe pse nuk kishin, vetëm për një natë

E dija se e humbur do dilja

Ndaj u jepem përzgjedhjes së atyre kënaqësive që ngrohin shpirtin me diell të ftohtë.

*

Toka është një arkivol riprodhues duke iu bërë shtrat kalbjes

Parajsa nuk ka shtrat të tillë,

Ligji universal: e përkryera s’ka riprodhim!

Udhëton frymës së ajrit

brenda çdo grimce nëntokësore

Lëvrin çdo molekule të ujt’ e të ajërt

E vetmja vizitore universale

përjeton përplasjet

rrymat,

lëviz çdo mekanizëm të mendjes njerëzore

duke e lënë të çalë zhvillimit të saj

A dashuron? Sigurisht, po!

Seksi frymor

mposht aktin më sublim mishtor të jetës

Dashuron kur don veç ajo të dashurojë

Zgjon,

afron në sekondë

atë element projektor elektrizues

në një të qindat e sekondit të saj

sado mijëra kilometra,

miliona vite drite larg

I vetmi nerv ku dridh përgjumjen

E pamundur t’i rezistosh kësaj madhështie.

E pas këtij zgjimi

Trupi im noton ujrash të qeta

Si krijesa më e përkryer shfaqur ndonjëherë.

Askush nuk e sheh

Veçse unë,

vetja ime dhe ti, kur je zgjuar.

*

A e din ti se kush jam?

Sigurisht, tani nuk e din… fli…

Janar 2025.