Nisi Java Kulturore Zvicerane – Dialog përmes kulturës

Java Kulturore Zvicerane 2025 filloi sot, duke ofruar një program nëntë ditor që shfaq krijimtarinë artistike të komunitetit të pavarur kulturor të Shqipërisë dhe nxit dialogun mbi çështjet sociale

Nisi Java Kulturore Zvicerane tek Piramida e Tiranës me organizim nga Ambasada Zvicerane dhe Fondi Kulturor Zviceran (SCF). Eventi hapës mblodhi bashkë aktorë të kulturës, artistë të mbështetur nga SCF, partnerë ndërkombëtarë dhe përfaqësues të medias.

Ambasadorja zvicerane Ruth Huber theksoi rëndësinë e kësaj nisme, duke thënë: “Kultura dhe artet kanë fuqinë për të nxitur ndryshimin. Zvicra njeh faktin që kultura kontribuon për zhvillimin, demokracinë dhe paqen. Ne jemi të privilegjuar që mbështesim skenën e pavarur kulturore të Shqipërisë përmes Fondit Kulturor Zviceran, duke ushqyer krijimtarinë e saj, duke përforcuar zërat e saj dhe përfundimisht, duke forcuar rolin e saj si një katalizator për ndryshim”.

Ndryshe nga javët tipike kulturore të organizuara nga ambasadat, ky event paraqet veprat e artistëve shqiptarë të mbështetur nga SCF. Është një partneritet me artistët, duke u fokusuar në tema si mësimet nga e kaluara, barazia gjinore dhe qëndrueshmëria mjedisore.

Java e Kulturës Zvicerane e këtij viti përmban një sërë ngjarjesh të pasura duke përfshirë:

· Shfaqje në muzikë, teatër dhe kërcim të cilat prekin dinamikat sociale dhe kulturore të Shqipërisë.

· Ekspozita që eksplorojnë ndikimin në mjedis të konsumerizmit, si dhe një rindërtim të Pazarit të Vjetër të Tiranës.

· Panele dhe diskutime që trajtojnë tema urgjente si vlera e ujit, përfaqësimi gjinor në industritë krijuese dhe trashëgimia e propagandës komuniste në Shqipëri.

Disa pika kryesore përfshijnë:

·  28 janar: ‘Muzikë për Njerëz të Thyer – një eksplorim simfonik i historisë komuniste të Shqipërisë.

·  29 janar: ‘Mbi Peizazhe Ujore’ – një shfaqje kërcimi dhe diskutim mbi vlerën e ujit.

·  1 shkurt: Premiera e ‘Midis nesh’ – një dramë që eksploron marrëdhëniet nënë-bijë.

·  7 shkurt 1: ‘Horizonte të Ndotura’ – një ekspozitë e artit dixhital që trajton qëndrueshmërinë mjedisore.

Që nga fillimi në 2017 SCF ka luajtur një rol kyç në mbështetjen e artistëve të pavarur dhe praktikuesve të kulturës në të gjithë Shqipërinë. Aktualisht, SCF fokusohet në shfrytëzimin e arteve dhe kulturës për të ndezur një dialog kuptimplotë mbi çështjet e zhvillimit, duke shfaqur aftësinë unike të artit për të frymëzuar reflektimin dhe lidhjen. Është projekt i Agjencisë Zvicerane për Zhvillim dhe Bashkëpunim (SDC).

Për më shumë informacion: https://swissculturalfund.al/