DEA TOÇI: BALLË PËR BALLË ME NJË TRËNDAFIL

Petalkë e çmuar kuq si gjaku

lumë pasioni ke brenda teje,

këtu ne ngjajmë më së paku

mua gjaku më rrjedh në deje.

*

Lule e bukur ti mbush me mall

çdo vajzë që të mban në duar,

unë mallin ia shuaj me zjarr

veç pak ta ndiej që e dua.

*

Vërtetë i bukuri trëndafil

po të sodis me kaq shumë ëndje,

mos u trishto ta them me stil

qafa ime mban erën tënde.

*

Sakaq më hoqe kureshtjen

të ngjashme jemi unë dhe ti,

por qenia ime thyen heshtjen,

unë jam lule me era shpirt.