Ti, që më 2 prill na erdhe

Ti, që më 3 prill na ike,

Më trishtove, keq ma zverdhe

Një këngë të bukur lirike.

*

Të thura këngë me refren

Tok me Shqiponjat e këngës

Se vjersha për Ramizenë[1]

Të preku telat e zemrës.

*

Dhe si divë, zëdrithëruese

E këndove shpirtlënduar,

Në përmasa rrezatuese

Ramizenë yllzbukuruar.

*

Po sa herë ne biseduam

Ti me at’ zë si mjaltë i mallit,

S’mund ta fshij dot, jo, nuk dua

Numrin tënd të celularit…

*

Prilli i bukurisë tënde

Si Zonjë e Madhe, ikonë

Si Margaritar në mendje

Më vjen, po aq vesë e njomë…

*

Ti dje festove datëlindjen

“Nderi i kombit”, po thjesht fare,

Sot më shkasin lotët, s’binden

Për ty, Pishë e Bardhë krenare.

*

Lot me lule prilli janë

Që më dhembin, sa një plagë,

Rolet vijnë, më ulen pranë

I kam për shpirtin mëllagë.

*

Ti, që loze Ofelinë

Shpirtëmira engjëllore,

Je një tufë me trëndelinë

Qesh si rreze diellore…

1. (Ndiq në YouTube: Margarita Xhepa reciton poezinë e poetit Albert Habazaj Pafajshmëria më e pafaj për Ramize Gjebrenë [Nuses së lirisë, dëshmores Ramize Gjebrea (20 prill 1923 – 6 Mars 1944)].

Ujë i Ftohtë, Vlorë, e enjte 3. 4. 2025.