SERBI – Parlamenti emëron Duro Macut si kryeministër të ri

Parlamenti serb konfirmoi sot emërimin e Duro Macut, mjekut me përvojë të kufizuar politike, si kryeministër i ri i vendit ballkanik.

Siç pritej, 61-vjeçari u zgjodh nga parlamenti me një shumicë votash.

Sipas agjencisë së lajmeve “Tanjug”, 153 nga 199 ligjvënës të pranishëm votuan pro qeverisë së re, 46 votuan kundër dhe 51 abstenuan.

Presidenti Aleksandar Vuçiç tha pas votimit se ai shpresonte se Macut do ta çlironte vendin nga terrori, duke iu referuar protestave në rrugë kundër qeverisë së tij që kanë vazhduar për më shumë se pesë muaj.

Vuçiç tha se demonstratat kishin çuar në një rënie të investimeve vendase dhe të huaja në Serbi.

Në janar, kryeministri i mëparshëm Milos Vucevic njoftoi dorëheqjen e tij, e cila u pa gjerësisht si një veprim taktik.

Vuçiç tani shpreson se emërimi i një kryeministri të ri do të ndihmojë në shuarjen e asaj që shumë e shohin si një krizë politike të paprecedentë.

Macut është shumë i respektuar në komunitetin mjekësor si endokrinolog. Megjithatë, politikisht, ai është njohur kryesisht si një mbështetës i vendosur i presidentit serb.

Vala e protestave u shkaktua nga shembja e një tende stacioni në qytetin verior serb të Novi Sadit, më 1 nëntor 2024 – që shkaktoi vdekjen e 16 personave.

Që atëherë, marshime dhe protesta pothuajse ditore janë zhvilluar në Beograd dhe nëpër shumë qytete të tjera serbe, duke mbetur kryesisht paqësore.

Protestuesit e shohin korrupsionin dhe dështimin e shtetit si shkaqet kryesore të katastrofës së Novi Sadit.

Ata po bëjnë thirrje për reforma sistematike për të luftuar korrupsionin dhe për të zbatuar ligjin e së drejtës./atsh