Albspirit

Media/News/Publishing

VATRA PROMOVON MË 19 PRILL 2025 LIBRIN E AMBASADORIT WILLIAM G. WALKER “REÇAK – HISTORIA E NJË KRIMI LUFTE”

Federata Pan-Shqiptare e Amerikës Vatra do të promovojë librin e Ambasador William G. Walker “Reçak – Historia e një krimi lufte”, ditën e Shtunë më 19 Prill 2025 ora 11 paradite në Selinë Qëndrore në Bronx në adresën: 2437 Southern Blvd, Bronx, NY 10458.

Libri “Reçak: Historia e një krimi lufte” nga William Walker sheh dritën e botimit, si anglisht, ashtu edhe në gjuhën shqipe.

Librat, më shumë sesa të mos harrohen emrat e autorëve, shkruhen për të mos harruar edhe ngjarjet e rëndësishme historike, të cilat vendosën për fatin përfundimtar të popujve në trajektoren e historisë. I tillë është edhe libri në fjalë, i shkruar nga Ambasadori William G. Walker: “Reçak: Historia e një krimi lufte”, i botuar nga shtëpia botuese “Dukagjini”.

Të shkruash një libër, duke rikujtuar ngjarjet e një kohe në zgrip, t’i ripërjetosh rishtazi të gjitha ato ngjarje të një tragjedie të madhe njerëzore, ta rikonceptosh ecejakun diplomatik, gjeopolitik dhe ndërhyrjen për një shkatërrim ushtarak të Jugosllavisë së Millosheviqit, është një përpjekje intelektuale dhe shpirtërore e pashoqe.

Rrëfenja boshtore e këtij libri është masakra e Reçakut dhe roli i ambasadorit William Walker, atëhere Shef i Misionit Verifikues në Kosovë në kuadër të OSBE-së, ku më 15 janar 1999 forcat serbe masakruan 45 civilë shqiptarë. Mesazhi i fjalëve të tij në cilësimin e kësaj ngjarjeje si “krim kundër njerëzimit” dhe jo “dënim dhune”, si dhe vënia e drejtësisë në vend për të vrarët do të ndryshojë përgjithmonë fatin e popullit të Kosovës, me ç’rast do të jetë shkas i ndërhyrjes ushtarake të NATO-s në Republikën Federale të Jugosllavisë.

Libri “Reçak: historia e një krimi lufte”, në fakt, është një autobiografi e ambasadorit Walker, në të cilin përshkruan jetën e tij që nga fëmijëria e deri në largimin e Misionit Verifikues të OSBE-së nga Kosova.

Ai është i ndarë në dy pjesë; ku pjesa e parë përshkruan autobiografinë e autorit nga fëmijëria deri te karriera e tij 40-vjeçare në Shërbimin e Jashtëm, përfshirë misionet në Japoni, Amerikën Latine dhe Ballkan, ndërsa pjesa e dytë fokusohet në përvojat e tij në Ballkan, sidomos në misionet e Kombeve të Bashkuara dhe OSBE-së në Kosovë.

Ambasadori Walker, përmes këtij libri, përbri trajektores së tragjedisë së madhe njerëzore që po përjetonte populli i Kosovës, i revokon edhe kujtimet rreth prapaskenave politike, pasigurinë dhe implikimin gjeopolitik e ndërkombëtar të masakrave të forcave serbe ndaj popullatës civile në Kosovë. Të gjitha këto janë të përshkruara në formë të një narracioni linear e dinamik, në ndërthurjen e komplekseve të ngjarjeve, me ç’rast e mban lexuesin kurioz e ndërveprues deri në fund.

Libri do të jetë në duart e lexuesve, pas një promovimi të mbyllur, në vigjilje të përvjetorit të Masakrës së Reçakut. Mirëpo, në librarinë “Dukagjini” do të organizohet një takim, ku lexuesit do të mund të takohen me ambasadorin William G. Walker, me ç’rast do të mund të diskutojnë për këtë kontekst politik dhe rolin esencial të KVM-së në Kosovë. Po ashtu, autori do të nënshkruajë kopje libri për të pranishmit.

Ditëve në vazhdim, libraria “Dukagjini” do t’ju përditësojë me informacione në lidhje me oraret e prezencës së ambasadorit William G. Walker dhe takimin me të.

Please follow and like us: