Estonia mban takimin inaugurues si Kryetare e Forumit të OSBE-së për Bashkëpunim dhe Siguri

VIENË, 14 maj – Sot, Estonia mbajti takimin e saj të parë si Kryetare e Forumit të OSBE-së për Bashkëpunim dhe Siguri (FSC). Gjatë mandatit të saj si Kryetare e FSC-së, Estonia do të synojë të forcojë dialogun dhe bashkëpunimin mbi sfidat e sigurisë me të cilat përballet rajoni, veçanërisht lufta e vazhdueshme e Rusisë kundër Ukrainës, e cila ka një ndikim të thellë në të gjithë rajonin e OSBE-së.

Gjatë seancës hapëse, Jonatan Vseviov, Sekretari i Përgjithshëm i Ministrisë së Punëve të Jashtme të Estonisë, përshkroi prioritetet e Estonisë si Kryetare.

“Estonia merr Kryesinë kur jemi larg realizimit të potencialit të plotë të FSC-së, ndërsa lufta kundër Ukrainës është duke vazhduar. Gjatë Kryesisë sonë, Estonia do të përparësojë tre tema gjatë zhvillimit të Dialogëve të Sigurisë në FSC: kontrollin demokratik të forcave të armatosura dhe të sigurisë, rolin e grave në forcimin e mbrojtjes dhe rezistencës, dhe mbrojtjen e fëmijëve në konfliktet e armatosura”, tha Sekretari i Përgjithshëm Vseviov.

“Ne e përgëzojmë Spanjën për punën e kryer gjatë Kryesisë së saj në tremujorin e parë të vitit 2025. Është e rëndësishme që ky Forum të mbahet funksional dhe të sigurohet që Shtetet Pjesëmarrëse të OSBE-së të jenë në gjendje të adresojnë çështje të rëndësishme politiko-ushtarake, bazuar në Parimet e Helsinkit që sot janë më të rëndësishme se kurrë”, tha Ambasadorja Kaja Tael, Përfaqësuese e Përhershme e Estonisë në OSBE.

Forumi i OSBE-së për Bashkëpunim dhe Siguri është organi vendimmarrës politiko-ushtarak i OSBE-së, i cili synon të nxisë normat e hapjes dhe transparencës midis Shteteve pjesëmarrëse të OSBE-së.

Kryesia e Forumit për Bashkëpunim dhe Siguri ndërrohet tre herë në vit. Estonia do të kryesojë FSC-në deri në shtator 2025.