Lulzim Tafa: Ditë e mërzisë virtuale

Unë nuk jam poet i instagramit

Njerëzit në instagram

Gjithmonë më janë dukur gënjeshtarë

Ta bëjnë like pa të lexuar

Të pafytyrët

Unë kam mijëra followers

Dhe sot s’kam folë me asnjë njeri

Merreni me mend çfarë vetmie e madhe

Gruaja që dashuroj

Më nuk është online

Ajo u arsyetua se ne

Nuk jemi më të lidhur

Edhe pse unë e kontrollova Wi-Fi-në

Dhe çdo gjë ishte në rregull

Nuk vonoi shumë dhe ajo

Postoi një porosi të vjetër të Shopenhauerit

“Merrni më pak kënaqësi, nëse doni më pak dhimbje”

S’e di pse papritmas

Më lind dëshira ta vras dikë që s’e njoh

Të panjohurit gjithmonë më janë dukur të rrezikshëm

Krejt në fund

Një gazetar i kulturës më pyeti

Çfarë jeni duke lexuar kohët e fundit?

Komente n’instagram

i thashë