Ismet Hajrullahu: E vërteta që nuk mund të fshihet…

Muzeu i Gjenocidit nuk është vetëm një institucion – është një dëshmi për viktimat, një kujtesë e përjetshme dhe një sfidë e drejtpërdrejtë ndaj mohimit dhe manipulimit historik.

Për më shumë se një shekull, shqiptarët kanë përjetuar një fushatë sistematike për zhdukjen e tyre…

Serbia ka ekzekutuar mijëra shqiptarë, ka zhdukur mijëra të tjerë dhe ka dëbuar me forcë mbi 1 milion njerëz nga shtëpitë e tyre. Pa një muze që dokumenton këto krime, e vërteta rrezikon të humbasë në harresë, ndërsa viktimat rrezikojnë të mbeten vetëm numra në raporte arkivore…

Gjenocidi serb nuk është histori e largët – ai është një realitet që ende sot prek mijëra familje të viktimave. 13,500 shqiptarë të vrarë, 1,600 të zhdukur dhe 20,000 gra të perdhunuara janë fakte që nuk mund të heshten…

Masakrat e Mejës, Krushës, Dubravës, Reçakut dhe qindra të tjera janë një dëshmi e dhimbjes së një kombi, një plagë që nuk mund të mbyllet pa drejtësi. Një komb nuk mund të ndërtojë të ardhmen nëse e vërteta e tij nuk është e njohur. Muzeu i Gjenocidit është pengesa e përhershme ndaj harresës dhe falsifikimit të historisë.

Ky muze duhet të ndërtohet pikërisht në Kishën e Millosheviqit, një objekt që u ngrit si simbol i dominimit serb mbi shqiptarët. Nuk mund të lejojmë që ajo të mbetet një relike e pushtimit. Duhet ta shndërrojmë në një qendër dokumentimi, në një memorial të përjetshëm për viktimat, në një hapësirë ku historia nuk mund të mohohet më. Ashtu si Gjermania e ktheu stadiumin e Nurembergut në një muze për gjenocidin nazist, Kosova duhet ta kthejë këtë hapësirë në një simbol të rezistencës, drejtësisë dhe kujtesës.

Bota nuk duhet të harrojë. Institucionet ndërkombëtare nuk mund të shmangin të vërtetën. Ky muze nuk është vetëm një projekt historik – është një dokument që sfidon mohimin, një mesazh i qartë që gjenocidi serb ndaj shqiptarëve nuk mund të relativizohet apo të fshihet. Nuk mund të ketë paqe pa drejtësi. Nuk mund të ketë pajtim pa njohjen e krimeve. Muzeu i Gjenocidit duhet të ndërtohet si një monument i kujtesës së përhershme  për viktimat, për të ardhmen dhe për të vërtetën!