Ngjarje e rëndë, Hungaria ndalon paradën LGBTQ
Shtatëmbëdhjetë vende të Bashkimit Evropian akuzuan të martën Hungarinë për shkelje të vlerave themelore të BE-së duke miratuar ligje që synojnë të godasin personat LGBTQ+, ndërsa tensionet thellohen midis Budapestit dhe shumicës së shteteve anëtare.
Parlamenti i Hungarisë miratoi legjislacionin në mars që krijon një bazë ligjore për të ndaluar marshimet LGBTQ atje dhe lejon policinë të përdorë kamerat e njohjes së fytyrës për të identifikuar njerëzit që marrin pjesë. Ai miratoi gjithashtu ndryshimet kushtetuese në prill që përcaktonin se Hungaria njeh vetëm dy gjini, mashkull dhe femër.
“Ne jemi shumë të alarmuar nga këto zhvillime që bien ndesh me vlerat themelore të dinjitetit njerëzor, lirisë, barazisë dhe respektit për të drejtat e njeriut”, thanë në një deklaratë të përbashkët qeveritë e 17 vendeve.
Ata i bënë thirrje Hungarisë që të rishikojë masat dhe i kërkuan Komisionit Evropian të përdorë plotësisht fuqitë e tij nëse Budapesti nuk e bën këtë. Komisioni mund të ndërmarrë veprime ligjore kundër shteteve anëtare nëse beson se ato po shkelin ligjin e BE-së.
Deklarata u mbështet nga Austria, Belgjika, Republika Çeke, Danimarka, Estonia, Finlanda, Franca, Gjermania, Irlanda, Letonia, Lituania, Luksemburgu, Holanda, Portugalia, Sllovenia, Spanja dhe Suedia.
Deklarata erdhi përpara një seance dëgjimore të martën në një proces të gjatë ku ministrat e BE-së shqyrtojnë shqetësimet se Hungaria është në rrezik për të shkelur vlerat thelbësore të BE-së.
Procesi në teori mund të çojë në heqjen e së drejtës së Hungarisë për të votuar mbi vendimet e BE-së. Por diplomatët thonë se nuk ka mbështetje të mjaftueshme midis 27 vendeve anëtare të BE-së për të ndërmarrë këtë hap.
Përgatiti për Hashtag.al, Klodian Manjani