Vargje poetike nga Eva S. Ceca
Kur zbriti Qershori
Qershori zbriti nga qielli
si princ që di ta mbajë heshtjen në shuplakë.
Sytë i kishte ngjyrë drite,
dhe flokët si fllad
që nuk ikën larg.
*
Nuk erdhi me zhurmë…
Hapat i kishte prej dielli të butë
dhe hije prej ylli që pritet të bjerë.
*
Ai nuk foli.
Vetëm më pa,
si një Zot që njeh kujtimet
që unë nuk i kam jetuar ende.
*
Mbi supe mbante gjelbërimin e pranverës,
në gjoks kishte lëkurën e pjekur të qershive,
dhe në duar mbante një lloj kohe tjetër:
atë që s’matet me orë,
por me dridhje zemre.
*
Ai nuk më premtoi asgjë,
por gjithçka ndodhi:
era ndaloi të fryjë pa lejen e tij,
lulet u përkulën,
dhe vetë dielli qëndroi pak më gjatë
mbi fytyrën time.
*
Qershori ishte hyjni e harruar,
që zbriste çdo vit vetëm një herë,
për të parë në sy
ata njerëz që kishin lindur në dritë
dhe mbartnin diell në heshtje.
*
Ai nuk qëndroi gjatë,
princat e përjetësisë nuk jetojnë në muaj,
por në çaste që s’t’i merr askush.
*
M’u afrua dhe më la në ballë
një puthje pa tingull,
që ende e mbaj si hajmali,
kur hesht në fund të çdo dite.
*
Qershori u largua,
por mua më dhuroi ca grimca hyjnore,
ca dritë-hije tokësore
dhe më shumë diell se dje.
——–
Unë kam lindur në Qershor
Kam lindur në Qershor,
kur dielli nuk më pyeti
nëse doja freski mëngjesi
apo ditë të nxehta.
M’i dha të dyja.
*
Në degët e pemëve
u varën qershitë si buzëqeshje të kuqe,
ndërsa era
më dhuroi fjalët e para
në gjuhën e dritës.
*
Qershori nuk është muaj,
është një dhuratë.
Është puthje që vjen nga dielli
dhe prekje që mbetet kujtim.
*
Kam lindur kur lulet
nuk e mësojnë më erën të flasë,
por heshtin me krenari.
Si gratë, që e njohin vlerën e vet
dhe nuk e shpallin me zë.
*
Qershori më solli vetë diellin,
në ngrohtësinë më të ëmbël
dhe më vuri në duar
një këngë që nuk shteron.
*
Jam e lindur
në mes të qershive dhe stinës që thërret.
E pranuar nga vera
si një sekret, që vjen me hijeshi.
*
Ndaj, kur dua të kujtoj veten,
nuk kërkoj në pasaporta,
por në aromën e një mëngjesi Qershori,
ku çdo gjë është e gjallë
dhe s’ka nevojë për justifikim.
