Dea Toçi: Kur dashuron poeti
Do të bësh një poet të dashurohet pas teje?
Mos ia bëj kurrë të lehtë,
rrugën për tek ti bëja përpjetëz
të kacavirret drejt teje
pa u kapur në asnjë degëz.
*
Jepi dramë, sfida, dhimbje,
vështirësitë muzën i ushqejnë
dhe pa muzë ai e di mirë
ka mbaruar, asgjë nuk ndjen.
*
Dështak i keq në rrethana lumturie poeti.
Duhen dhe ca lot gëzimi
nuk them mos ia jep,
por ah çfarë drame…
*
Në gëzim me lot muza mbeti.
Poetin bëje të ketë frikë, ankth, dyshime
do shpërthejë muza si kurrë më parë
dhe do shkruajë,
do i shkruajë shumë frikës
për mos të të humbur,
për të të parë.
*
Vetëm kujdes!
Në çdo varg që ai shkruan
e godet ndjenjën në qelizë,
ëmbël e vret në qetësi.
Në çdo varg që ti do e lexosh
do ta duash më shumë për të dy.
*
Edhe do çmendesh ti në fund
se me poetin ke rënë në dashuri,
por ai tashmë ka ikur larg,
drejt një muze të re në kërkim.
