Sadik Bejko: “Krimineli” nga Shpiragu
Mars 1975. Fshati Paftal, rrëzë malit Shpirag, Berat.
Ramadan Tahiraj, 41 vjeç, hyn në konflikt me Kryetarin e fshatit.
Dania pa lejë ka ngritur deri 1 metër muret për shtëpi në truallin e tij. Kërkonte leje ndërtimi me gojë, edhe me shkrim, Kryetari për inat nuk ia jepte.
E thërrasin në zyrën e Kryetarit. E shajnë. Policët e rrahin Danen. Të prishte muret patjetër.
Danes i kërceu inati.
Nxjerr një pushkë italiane të LIIB. Kish qenë ushtar kufiri në Jug. Snaiper.
Të nesërmen i paralajmëroi se do të qëllojë, po t’ia prekin muret.
Kryetari, kryepolici i zonës dhe ndihmësi vënë dorë mbi mure. Krisi pushka. Kryepolici dhe ndihmësi vriten. Kryetari dinak, nxitësi i gjithë kësaj historie, rrokulliset brinjaz dhe u shpëton plumbave.
Ushtari i kufiri Dane i njihte taktikat policore për kapjen e kriminelit.
U fsheh.
Një javë nuk e gjenin. Alarm shtetëror. Kufinjtë e shtetit në gadishmëri nr.1.
Një zvministër i brendshëm vihet në krye të operacionit. Ushtarë, policë, forca të ndjekjes. Qen kufiri. Forca vullnetare nga Berati, Skrapari, Gramshi.
Java e dytë.
Dania i fshehur.
Vret qenin Valbona më të mirin e vendit.
E ndjekin.
Në majë të Shpiragut. Matanë Shpiragut rrëmben një grua për t’i shpëtuar rrethimit. Gruaja e fortë. Dania i lodhur, pa ujë, pa bukë. Ajo u përfyt me Danen. Në përleshje gruaja u vra.
Mbas kësaj forcat e ndjekjes e bënë shoshë me plumba.
Trupin ia flakën para spitalit Berat që ta shihnin.
Rebelimi i Danes qe një akt tipik vetvrasës.
Por rezistenca e tij 10 ditore ndaj një shteti ku nuk lëviste as miza, bëri bujë.
Dania tregoi dinjitet përballë poshtërimit të shteti ndaj qytetarit të vet.
Poshtërimi, rrahja prej zyrtarëve të shtetit e bënë kriminel.
U ngritën këngë:
Doli Dania nga Gorica/ e na vrau dy polica. / Doli Dania prej ullirit/ Vrau qenin e kufirit.
Shteti bëri një gjyq për t’i hedhur një batanie arrogancës, arbitraritetit të vet. Policët u dënuan pas vdekje. Kryetari u dënua. Doli një urdhër që ndërtimet për banim pa lejë kur kalojnë mbi një metër, nuk prishen.
Post Scriptum: Danen e kujtova jo se ka ndonjë lidhje me fadromat e sotme.
