Pozitë-opozitë/Qëndrim dinjitoz i Prishtinës dhe Tiranës zyrtare
Osmani: Ka ardhur ora e lirisë në Iran, Kosova qëndron me SHBA-të
Presidentja Vjosa Osmani, ka reaguar ndaj sulmeve të Shteteve të Bashkuara të Amerikës (SHBA) në Iran. Osmani ka shprehur mbështetjen e saj ndaj SHBA-së për sulmin ndaj Iranit. “Ka ardhur ora e lirisë për popullin e Iranit, falë udhëheqjes së Shteteve të Bashkuara dhe Presidentit Donald Trump. Si gjithmonë, Republika e Kosovës qëndron pa luhatje me Shtetet e Bashkuara dhe aleatët e saj në mbrojtje të lirisë, paqes, sigurisë dhe stabilitetit”, ka shkruar Osmani në platformën sociale “X”. Presidentja Osmani dënon sulmet e regjimit iranian ndaj aleatëve të Kosovës në Lindjen e Mesme. “Do të vazhdojmë të mbështesim veprimet e ndërmarra nga Shtetet e Bashkuara dhe aleatët e tjerë për t’i dhënë fund regjimit iranian dhe për të dhënë një mundësi lirisë dhe paqes”, shkruan ajo. Edhe Ministria e Punëve të Jashtme dhe Diasporës, thekson se Kosova qëndron krah Presidentit Donald Trump në përpjekjen për të frenuar regjimet që kërcënojnë popujt e lirë, për të mbrojtur stabilitetin global dhe për të mbështetur aspiratat legjitime të popullit iranian për liri, dinjitet dhe demokraci. Izraeli nisi atë që e quajti një “sulm parandalues” kundër Iranit të shtunën në mëngjes, sipas Ministrit të Mbrojtjes, Israel Katz, dhe shpalli gjendje të jashtëzakonshme në të gjithë vendin. Një burim izraelit i tha CNN se sulmi ishte i koordinuar me Shtetet e Bashkuara. Sulmi vjen pasi Presidenti i SHBA-së Donald Trump kaloi javë duke kërcënuar se do ta godiste Iranin për programin e tij bërthamor, si dhe një shtypje të brendshme që ka vrarë mijëra protestues. /KosovaPress/
Berisha: Le të urojmë që regjimi iranian të marrë ndëshkimin e merituar
Kryetari i Partisë Demokratike, Sali Berisha, komentoi sot gjatë një bashkëbisedimi me qytetarët në rrjetet sociale, sulmet ajrore të SHBA dhe Izraelit ndaj rezidencave dhe qendrave të udhëheqësve të regjimit teokratik të Iranit. “Sot në mëngjes, agjencitë e lajmeve njoftuan se forcat ajrore të Izraelit dhe të SHBA kanë bombarduar rezidencat dhe qendrat e udhëheqësve diktatoriale teokratikë të ajatollahëve të Iranit”, tha Berisha. Berisha u shpreh se, ky regjim ka shkaktuar vrasjen e shumë të rinjve dhe qytetarëve të vet, dhe u shpreh i bindur se ndërhyrja e forcave ndërkombëtare është një ndëshkim i merituar. “Le të urojmë që kanë marrë përgjigjen e merituar pasi ky regjim ka vrarë të rinj dhe të reja, qytetarë të vet, më shumë se çdo regjim i kohës së sotme”, theksoi Berisha./atsh
Rama: Shqipëria shpall Gardën Revolucionare organizatë terroriste, koha për veprim
Kryeministri Edi Rama reagoi sot në rrjetin social X lidhur me sulmet e fundit të SHBA dhe Izraelit ndaj strukturave të Korpusit të Gardës Revolucionare Islamike të Iranit, duke theksuar se Shqipëria do të veprojë për ta renditur këtë organizatë mes strukturave terroriste. “Është koha e duhur për të ndërmarrë veprime vendimtare dhe për të shkuar drejtpërdrejt në thelb. Korpusi i Gardës Revolucionare Islamike është një organizatë terroriste dhe duhet të trajtohet si e tillë. Jo vetëm përmes sanksioneve kundër Republikës Khomeiniste, por duke e quajtur zyrtarisht me emrin e saj të vërtetë dhe duke e renditur mes organizatave terroriste, ashtu siç kanë bërë tashmë Shtetet e Bashkuara të Amerikës dhe Kanadaja”, theksoi Rama. “Jo vetëm sepse qëndrojmë të palëkundur me Izraelin dhe me vendet vëllazërore arabe që kërkojnë paqe. Jo vetëm sepse mbështesim Shtetet e Bashkuara të Amerikës në mbështetjen ushtarake të Izraelit sot, nën udhëheqjen e presidentit Donald Trump. Jo vetëm sepse Bashkimi Evropian, përmes presidentes Ursula von der Leyen, ka nënvizuar edhe një herë sot natyrën vrastare të regjimit të Teheranit. Por para së gjithash, në një ditë si kjo, kur kërkohen veprime, jo vetëm fjalë, në nderim të viktimave të pafundme të pafajshme të përgjakshme të Korpusit të Gardës Revolucionare Islamike”, shtoi Rama. Kryeministri theksoi se, Shqipëria është përballur drejtpërdrejt me fytyrën barbare të regjimit të Teheranit përmes agresioneve të tij kibernetike kundër vendit tonë. “Për ne, kjo nuk është gjeopolitikë abstrakte. Është siguri kombëtare, qartësi morale dhe ligjore. Shqipëria do të veprojë në përputhje me këtë. Ne do ta quajmë Gardën Revolucionare atë që është dhe do ta rendisim mes organizatave terroriste, dhe u bëjmë thirrje miqve tanë evropianë të bëjnë të njëjtën gjë”, theksoi Rama. “Ne mbështesim plotësisht çdo përpjekje vendimtare për të parandaluar njëherë e përgjithmonë vrasësit në Teheran që të fitojnë kapacitete bërthamore ose çdo kapacitet tjetër ushtarak për të dëmtuar Izraelin apo ndonjë komb tjetër paqedashës në Lindjen e Mesme. Terrorizmi duhet të emërtohet. Dhe pasi të emërtohet, duhet të ndalet”, u shpreh Rama./atsh
