Beogradi blen raketa balistike kineze për MiG-29
Revista Military Watch raportoi se Serbia është bërë vendi i parë në Evropë, forcat ajrore të së cilës janë pajisur me raketa balistike kineze, duke rritur ndjeshëm aftësitë e avionëve luftarakë MiG-29.
Fotografitë që tregojnë një avion luftarak MiG-29 të Forcave Ajrore të Serbisë duke fluturuar me dy raketa balistike CM-400AKG të furnizuara nga Kina tregojnë se Serbia është bërë operatori i dytë i huaj i këtij lloji rakete. Sipas portalit Military Watch, blerja e tyre ka revolucionarizuar aftësitë e mëparshme shumë të kufizuara goditëse të këtyre avionëve.
“Shpejtësia e raketës, e cila mund të kalojë Mach 6, i bën MiG-29 serbe avionët e parë luftarakë në Evropë me aftësi goditëse hipersonike,” thuhet në portal.
Sipas tij, raketa ajër-tokë përdor navigim inercial, navigim satelitor dhe udhëzim me radar pasiv dhe ka një rreze veprimi deri në 400 kilometra. Portali kujton se Serbia trashëgoi një numër të vogël avionësh MiG-29 nga Forcat Ajrore të ish-Jugosllavisë dhe më pas mori edhe disa të tjerë si ndihmë nga Bjellorusia dhe Rusia gjatë viteve 2000 dhe 2010.
Ai shton se asnjë avion tjetër luftarak në Evropë nuk ka të integruara raketa ajër-tokë të afta të operojnë me shpejtësi hipersonike, përfshirë edhe avionët e Forcave Ajrore të SHBA-së.
“MiG-29 serbe përdorin radarë që janë disa gjenerata prapa teknologjisë më të avancuar, gjë që ka kufizuar seriozisht potencialin e tyre në luftimet ajër-ajër. Integrimi i raketës CM-400AKG përmirëson ndjeshëm potencialin e tyre luftarak dhe kompenson mangësitë e tjera. Meqë raketat lëshohen duke përdorur të dhëna shënjestrimi të siguruara nga sensorë të jashtëm, vjetërsia e radarit të vetë MiG-29 nuk ndikon në performancë,” thuhet në raport.
Military Watch thekson se kishte indikacione që ushtria serbe mund të nxirrte nga përdorimi avionët MiG-29 pas blerjes së avionëve luftarakë Rafale nga Franca, megjithëse në versione të reduktuara pa raketën e tyre kryesore ajër-ajër, Meteor.
Portali shton se Beogradi ka qenë nën presion nga Evropa për të kufizuar blerjet ushtarake nga Rusia dhe Kina, por se “kjo është konsideruar një vendim më pak problematik në Evropë për shkak të intensitetit shumë më të madh të konfliktit të Bashkimit Evropian me Rusinë”.
Ai thekson se autoritetet serbe zgjodhën sistemin kinez të mbrojtjes ajrore HQ-22 në vend të sistemeve ruse S-300 ose S-400, “duke përfaqësuar një moment të rëndësishëm në marrëdhëniet e mëparshme të kufizuara të mbrojtjes midis dy vendeve”.
Sipas portalit, raketat kineze të kombinuara me aftësinë e MiG-29 për t’u ngritur nga pista të shkurtra ose fusha ajrore të improvizuara, gjë që u lejon të shpërndahen dhe i bën shumë të vështira për t’u neutralizuar nga ajri, krijojnë një mjet asimetrik për të sfiduar forcat e NATO-s në rast të një konflikti të ri rajonal.
“Vendimi për modernizimin e MiG-29 me raketat e reja kineze tregon se këta avionë ka shumë të ngjarë të mbahen në shërbim edhe për të ardhmen e afërt dhe mund të çojë Ministrinë serbe të Mbrojtjes të financojë blerje të tjera të këtyre avionëve nga rezervat e mëdha të Rusisë,” përfundon portali.
