Prokuroria për Krimet e Rënda është duke u marrë intensivisht me hetimet për grabitjen e ndodhur gjatë ditës së djeshme në aeroportin e Rinasit.

Burime nga organi i Akuzës thonë për Express se janë lëshuar 5 urdhër arreste që prekin drejtpërdrejtë funksionarë të aeroportit ndërkombëtar “Nënë Tereza”. Burimet nuk saktësojnë emrat e personave, por thonë se mes tyre janë punonjës edhe të firmës së kontraktuar për sigurinë në aeroport, ICTS-Albania.

Dyshimet e organit të akuzës janë që këta persona të kenë bashkëpunuar me tre grabitësit të cilët mundën të futeshin deri në pistën e aeroportit duke grabitur rreth 1 milionë euro. Ata dyshohet të kenë dhënë informacione për transportimin e parave të një banke të nivelit të dytë, me avion jashtë Shqipërisë.