Natasha Lako: Rozmari Jorganxhi u kthye në përjetësi
Që vajzë e vogël e viteve ‘50 në skenën korçare të fëmijërisë, pambarimisht me kontributin e saj gati magjik si dirigjente kori e Operës Shqiptare dhe mezzosoprano, deri sa jep kontributin e saj në operën e Triestës, dhjetra vjet të jetës së saj kushtuar muzikës dhe rrugës të talenteve, e bëjnë Rozmari Jorganxhiun një yll polar udhërrëfyes, për të gjithë vajzat e sotme shqiptare, jo vetëm brenda notave muzikore.
Në piedestalin koral të talentit femëror, mbetet i përjetshëm dirigjimi i Rozmari Jorganxhiut, kësaj gruaje të talentuar në mendim dhe ndjenjë, forcë dhe dashuri femërore të cilat përmblidhen në një kthjelltësi shpirti, të kthyer në ëngjëll. Ngushëllime familjes, miqve dhe Zhulianës, mikes sime si motër.
Kush ishte Rozmari Jorganxhi?
Rozmari Jorganxhi ka nisur karrierën e saj që në vitin 1959 si soliste lirike. “Mezzosoprano” në TOB dhe ka interpretuar me profesionalizëm në nivele të larta role nga operat ndërkombëtare, por edhe ato kombëtare. Nga viti 1967-1984 ajo ka dirigjuar Korin e TOB duke qenë femra e parë dirigjente e këtij institucioni unik të kulturës shqiptare. Më 1993 Jorganxhi në moshën 56-vjeçare fiton audicionin dhe fillon si këngëtare profesioniste në Teatrin Giusepe Verdi të Triestes ku këndoi për 10 vjet. Zonja Jorganxhi ka dhënë dekada mësim në Universitetin e Muzikës duke i dhënë kulturës shqiptare emra artistësh si në fushën e dirigjimit ashtu edhe në atë të kantos.
Rozmari ka lindur në një familje me tradita muzikore nga ana e të atit, “Artistit të Merituar” Gaqo Jorganxhi, i cili këndoi për 65 vjet si solist në qytetin e Korçës, që prej vitit 1920, kur u krijuan shoqëritë e para muzikore në këtë qytet. Vetë qyteti i Korçës ka nxjerrë artistë lirike si Tefta Tashko Koço, Jorgjie Truja, (e cila ka qenë dhe regjisorja e parë e TKOB), Mihal Ciko, Kristaq Antoniu etj, (kanë qenë dhe mbeten ikona, qe ngritën themelet e artit lirik në Shqipëri). Shkoi për studime në Liceun Artistik “Jordan Misja” në Tiranë, ku pati si pedagoge kantoje “Artisten e Popullit” Marie Kraja. Në atë kohë pedagogë kantoje si ajo ishin dhe këngëtarët e parë lirikë si Jorgjie Truja, Gjyzepina Kosturi, Mihal Ciko. Më pas shkoi për studime në Konservatorin e Moskës për kanto ku ishin: Avni Mula “ Nderi i Kombit”, Mentor Xhemali “Artist i Popullit”,Gjoni Athanas “Mjeshtri i Madh”, Ibrahim Tukiqi “Artist i Popullit”. E vetmja vajzë mes tyre ishte Rozmari që ishte dhe më e reja në moshë, vetëm 15 vjeç! Në këtë Konservator, sot Akademia e Artit të muzikës, ajo gjeti të ndriturin Lluk Kaçaj “Nderi i Kombit”, Albert Papariston, Maliq Herrin, Çesk Zadenë “Artist i Popullit”, Tish Daijen “Nderi i Kombit”, Hamide Stringën. Për dirigjentë me të kanë studiuar Rifat Teqja “Artist i Popullit”, për dirigjent orkestre dhe Milto Vako “Artist i Merituar” dirigjent kori. Më vonë erdhën për studime në këtë Konservator kompozitor Nikolla Zoraqi “Artist i Popullit”, këngëtaret si Irena Gjergo, Luiza Papa, Gjinovefa Heba, Gaqo Çako “Artist i Popullit”. Vazhdoi dirigjimin dhe kanton për 7 vjet duke dalë shkëlqyeshëm. Në vitin 2017, në moshën 80-të vjeçare ajo mori titullin “Mjeshtre e Madhe”.