Prof. Asoc. Dr. Zaho Golemi: Mirënjohja e policisë për krykomisaren Luiza Filaj
Prof. Asoc. Dr. Zaho Golemi,
Akademia e Sigurisë
Kontributi në strukturën e rendit dhe sigurisë publike në polici nuk është privilegj, por përgjegjësi. Policia që në kohën që u krijua e në vijimësi ka kërkuar dhe kërkon mund e djersë, përkushtim, sakrifica të panumërta. Duhet të depërtosh në “lëkurën” e kësaj strukture ta njohësh, ta prekësh, ta ndjesh përditshmërinë e sakrificave, punën e madhe për t’ju siguruar njerëzve qetësinë, rendin e sigurinë. Në historikun 112 vjeçar të Policisë së Shtetit, si dhe në historikun 54 vjeçar të Akademisë së Sigurisë (ish-Shkolla e MPB), kanë shërbyer qindra mijëra punonjës policie, që i kanë dhënë shumë organizatës së policisë, e kanë rritur dhe konsoliduar në vlera. Ne do të dallonim sot një prej tyre që ka shërbyer gjithë jetën në Policinë e Shtetit, që në hierarkinë e gradave policore dallon më shumë për hierarkinë e vlerave policore.
Kryekomisare Luiza është vajza e heroit Muhamet Shehu, që u përlesh me flakët e pusit të naftës dhe ngeli përjetësisht në memorjen shqiptare, si një legjendë e dashur e shqiptarizmës. Në kujtesën mbarëpopullore të 1967-ës jeton Muhamet Shehu dhe Myrteza Kepi, që të dy heronj të punës, pasi ranë së bashku në krye të detyrës, në përleshje me flakët e një zjarri të fuqishëm që shpërtheu në stacionin e pompimit të naftës të Linasit, në rrethin e Elbasanit, më 15.2.1967, ku akti i tyre heroik u bë shembull frymëzimi për sektorin jetik të naftës. Muhamet Shehu (1930-1967), babai i Luizës, ishte lindur në fshatin Bicaj të Kukësit në një familje të shquar atdhetare dhe patriotike, që kishte shkuar në radhët e formacioneve antifashiste që në moshën 13-vjeçare. Ai pas çlirimit kreu studimet e larta për inxhinier nafte në ish-BS dhe punoi në sektorë të ndryshëm të industrisë së naftës, ku u dallua për punë të palodhur e aftësi profesionale. Luiza dhe vëllai i saj ngelën pa baba në moshë shumë të vogël. Por jetën e saj Luiza e ngriti me djersë, sakrifica, mundim e ndershmëri, ofroi profesionalizmin dhe sfidoi vështirësitë. Në këtë fillimprillë është një stacion i ri i shkëputjes nga radhët e Policisë së shtetit për Luizën, por është një stacion që meriton mirënjohje, mirënjohjen që është fisnikëri një virtyt njerëzor që shpesh edhe “harrohet”. Por mjedisi shoqëror ku ka punuar Kryekomisare Luiza shpreh pa rezerva mirënjohje një ndjenjë falënderuese, një virtyt që pasuron ata që e shfaqin dhe lumturon atë që i adresohet.
Luiza Shehu (Filaj) është lindur më 7.6.1963 nga një nënë e dashur dhe e përkushtuar. Luiza me të vëllanë ngelën vetëm me nënën pasi babai ngeli përjetësisht në puset e naftës. Arsimin fillor e tetëvjeçar i përfundoi me rezultate të larta dhe vijoi Shkollën e Mesme Tregëtare në Vlorë (1978-1982). Arsimin e lartë e ka kryer në Fakultetin Ekonomik UT, në vitet 1982-1986 me rezultate shumë të mira. Karriera policore e saj ka nisur me funksionin: “ekonomiste në prapavijë në Drejtorinë e Rendit Publik Tiranë” për periudhën 1991-1992 dhe më tej: Ekonomiste plani në drejtorinë e Policisë së Tiranës (1992-1993); Specialiste e programim buxhetimit KP 3 Tiranë (1993-1998); Specialiste prokurimesh në Drejtorinë e Policisë së Tiranës dhe sektorë të tjerë (1998-2009); Shef Sektori dhe specialist në Sektorin e Trajnimit në Drejtorine e Personelit (2009-2012); Specialist për koordinim në Departamentin e trajnimit, Sektori i Menaxhimit të Burimeve Njerëzore, Drejtoria e Burimeve Njerezore dhe Drejtorinë e shërbimeve mbështetëse në DPPSH (2013-2017); Specialiste në Sektori i Trajnimit dhe Përgatitjes, në Drejtorinë e Burimeve Njerëzore (2017-2022); Nga viti 2022 e në vijim përreth tre vite ka shërbyer specialistë e Kërkimit Shkencor në Sektorin e Kërki mit Shkencor, Projekteve dhe Inovacionit në QKSHP, në Akademinë e Sigurisë. Në hierarkinë e karrierës policore ka pasur këto grada: graduar oficere (me urdhër të MB nr.226/1 datë 13.4.1992), graduar kapitene (urdh.nr. 1/33 datë 20.10.1994); graduar kapiten i parë (Urdh.nr. 326/3 dt. 06.2.1999), graduar Kryeinspektore (urdh. nr. 602 datë 1.5.2003); graduar kryekomisare (2008); dhe sërish kryekomisare me riorganizimin e vitit 2016 (urdh.194/1 datë 26.1.2016). Arsimimi i vazhdueshëm ka qenë për specialisten e Policisë në më shumë se dy dekada, për gjuhën angleze (2005), për kurse kompjuteri (2000), për trajnim policor (2003), për sistemin Syberëorks (2010-11), disa kurse për zhvillimet profesionale të femrave në polici, për trajnimin e trajnerëve, për menaxhimin e burimeve njerëzore si dhe disa trajnime policore të viteve 2012-2013. Ajo ka merituar respek dhe mirënjohje në të gjitha detyrat që ka kryer. Por vlerësimin e parë mirënjohës në Polici e ka marrë në Akademinë e Sigurisë në vitin 2024, me motivacion: “Për punë të ndërgjegjshme dhe me korrektesë në kryerjen e detyrave të ngarkuara në funksion të përmbushjes së misionit dhe përgjegjësive në çdo detyrë që ka kryer në shërbim të Policisë së Shtetit”. Drejtori i Përgjithshëm i Policisë së Shtetit Drejtues Madhor Ilir Proda, i ka akorduar gjithshtu Certifikatën e Karrierës, “Për merita të vecanta, profesionalizmin dhe përkushtimin e treguar për përmbushjen e detyrave dhe kontributin e dhënë gjatë viteve të punës, në shërbim të Policisë së Shtetit”.
Që prej korrikut 2022 ka punuar pranë Akademisë së Sigurisë si specialiste në Sektorin e Kërkimit Shkencor Projekteve dhe Inovacionit. Ajo ka marrë pjesë në dy Konferenca shkencore të rëndësishme, si detyrime institucionale, që kanë qenë “Konferenca mbi sigurinë kibernetike në organizata: paraqitja e modelit konceptual për arritjen e përsosmërisë kibernetike” të përgatitur me bashkëautorësi në kuadër të Konferencës së IX-të shkencore ndërkombëtare “Krimi dhe siguria kibernetike”. Ndërsa në kuadrin e zhvillimit të konferencës X shkencore e Akademisë së Sigurisë: “Policia e Shtetit në 80-vjetorin e çlirimit të Atdheut, arritje dhe sfida” me bashëautorësi Kryekomisare Luiza Filaj paraqiti më 20 nëntor 2024, kumtesën “Sfidat e Sigurisë së forcave të rendit në epokën bashkëkohore: rast analize, strategjitë për përballimin e krimit të organizuar dhe policimit në komunitet”.
Kryekomisare Luiza Filaj nuk pranon vlerësime e lëvdata, as shkrime. Ajo mbetet e thjeshtë, njerëzore, e përkushtuar ndaj familjes, nënës, mbesës, një personalitet-vlerë për shoqërinë policore, pasi kudo ku ka punuar në strukturën e Policisë ka mbetur etalon i mirësisë njerëzore, korrektësisë dhe përkushtimit në punë. Ajo u bë e njohur në QKSHP, në Sektorin e Kërkimit Shkencor, që kishte një kulturë të pasur pune, që gjithë jetën në organizatën e Policisë e kishte si një testament korrektësie si shtetare.
Fakt është se ajo ka qenë modeli frymëzues për brezat e rinj të Policisë së Shtetit, edhe pse mosha biologjike është vetëm çështje numrash. Puna e saj e papërtuar, mbështetja për të rinjtë, përveshja vullnetare e mëngëve, duke mos u tërhequr kurrë para asnjë vështirësie ishte dhe ngelet imazhi i veprimit pozitiv për Policinë dhe sidomos për Akademinë e Sigurisë ku punoi pothuaj tre vitet e fundit. Njerëzit që e kanë ushqyer shpirtin me punë, pa hile kanë lënë gjurmë thjeshtësie dhe ndershmërie. Theshtësia dhe puna e ndershme kanë qenë dhe kanë ngelur pasuria më e madhe e njeriut. Gjithë profesionet janë mision, prandaj edhe ushtrimi i funksioneve në mbrojtje, në siguri e rend publik, në ekonomi, mësuesi, mjekësi, diplomaci etj., janë mision. Si mision është parë edhe ushtrimi i funksioneve në Polici dhe kjo është zgjedhje individuale, edhe pse në kohën kur ka hyrë kryekomisare Luiza në Polici zgjedhjet nuk kishin kushte, por vetëm obligim ndaj detyrës. Kryekomisare Luiza bën pjesë në njerëzit e mençur që ka shërbyer se “na bashkon urdhëri”, por ka qenë dinjitoze dhe krenare për punën dhe jetën, që ka ditur të përballet dhe përballojë sfidat. Bashkëkolegët dhe bashkëpunëtorët në organizatën e Policisë janë krenarë që kanë pasur një kolege me vlerë, që bën pjesë në asetet që nuk e mposhtën vështirësitë. Ata përbashkohen në një zakon-ritual institucional të respektimit në ditët kulmore jetësore sikurse është edhe dita e pensionimit, duke e shndruar këtë ditë në ditë gëzimi të veçantë.
Është fakt se Kryekomisare Luiza ofron si gjithmonë optimizëm shoqëror e familjar, ka qenë “e dënuar”, të ofrojë ekspertizë veçanërisht në fushën ekonomike, në strukturat mbështetëse të DPPSH. Është kjo arsyeja që “mosha biologjike” e pensionimit nuk ekziston, pasi vlerat e Policisë janë gjithmonë bashkë në çdo frymëmarrje e zhvillim progresiv të policisë. Mosha biologjike është vetëm numra. Gradat e hierarkisë njerëzore mbeten grada të hierarkisë së vlerave, qëndrojnë lartë në imazhin e kolegëve të punës, mbeten pika referimi e frymëzimi, mbeten përherë të pa shkëputura në kujtesën njerëzore. Shkëputja nga institucioni është thjesht një “urdhër”, pasi uniteti njerëzor shkon përtej urdhërave. K/komisare Luiza Filaj ishte dhe ngelet shpirtërisht e lidhur me organizatën e Policisë. Koha bën të vetën, ecën, nuk ndalet. Jeta rrjedh, por nuk ka skenar që të “thyej” shpirtrat njerëzorë, gëzimin dhe lidhjen me institucionin, edhe pse vijueshmëria e hobeve personale e familjare drejt eksplorimit të shtigjeve malore, bukurive të peizazheve shqiptare, por dhe bregdetit e peshkimit, natyrshëm do të vojojnë, edhe me më shumë kohë në dispozicion. Urdhëri respektohet e zbatohet “zyrtarisht” sikurse vjen “zyrtarisht”, mirëpritet në respekt të ligjit, edhe përtej dëshirave. Kur urdhëri përputhet me dëshirat dhe pritshmëritë rritet qetësia e lumturia njerëzore familjare, rritet angazhimi familjar dhe përkujesja prindërore edhe si nënë edhe si gjyshe. Njerëzit e zakonshëm të policisë ndihen krenarë për vitet nën uniformë, ndjehen krenarë për jetën e jetuar njerëzisht, me përkushtim si shtetarë seriozë në familjen e madhe të përbashkët të rendit dhe sigurisë publike, gjithmonë për detyrën-nderin-Atdheun. Miqtë, kolegët, bashkëpunëtorët në rrugëtimin e gjatë në strukturat e Policisë së Shtetit i urojnë Kryekomisare Luizës shëndet dhe jetë të gjatë! Përbashkohet në këtë urim gjithë organizata e madhe e Policisë.
-&-