Selaudin Guma: Gjenerali i Alpeve

 

Poshtë shpella, lart shkëmbi

Në Shpellën e Dragobisë

Ka mbetur si përmendore

Në panteonin e artë.

 

Ka strehuar luftëtarë

Të penës dhe të dyfekut

Ke strehuar Bajram Currin

Dhe Prek Calin gjeneral.

 

Gjeneral të lartmadhërisë

Martirin e gjithë Malësisë

Luftoi serbë e malazesë

Dhe bullgarë të pabesë.

 

Nuk e donte komunizmin

Si pjellë të pansllavizmit

Pushkë e gjatë në ato male

Jehon si shqiponjë krenare.

 

Tu turr ti tradhëtia

Me hafije, me ushtarë

Sollën një ushtri të tërë

Me topa e trambujanë.

 

Qëllon topi, edhe plumbi

Sa u shmëtua dhe gurin

Për 10 veta, trima mali

Që luftonin me Prek Calin.

 

Prek Cali, burrë i rrallë

Qe si guri i fortë i strrallit

Kish mbrojtur kufijtë tanë

Kur shkeli këmba e sllavit.

 

Emëruar nga mbreti i parë

Komandant e gjeneral

Luftuan trimat e Calit

Si shqiponjat majë malit.

 

Gjenerali, burrë i zgjuar

S’donte të flijonte trimat

I urdhëroi qartë e prerë

Për të dalë nga kjo shpellë:

 

Ju tani do të dorëzoheni

Mbase do ju falet jeta

Të gjithë jeni djem të rinj

Jo më nëna me të zeza.

 

Unë jam komandanti juaj

Do dorëzohem më në fund

Kështu e kanë kapedanët

Në fund e lënë istikamin.

 

I la djemtë, trimat e malit

Të iknin nga vdekja pranë

Vetë luftoi Prek Cali

S’doli nga shpella i gjallë.