Kompanitë teknologjike, masa kundër Rusisë

Ukraina ka nisur një fushatë publike, kryesisht nëpërmjet mediave sociale, duke u bërë thirrje institucioneve të fuqishme teknologjike që të ndërpresin marrëveshjet me Rusinë. Lista e kompanive që kanë marrë masa kundër Rusisë me siguri do të zgjerohet në ditët dhe javët në vazhdim.

 

Ndërkohë që lufta në Ukrainë vijon, me forcat ruse që i afrohen kryeqytetit, Kievit, industria teknologjike në botë po u bashkohet qeverive dhe komunitetit ndërkombëtar në marrjen e masave për të ndëshkuar Vladimir Putin.

Dhjetëra kompani në Silicon Valley dhe në botë, po i përgjigjen pushtimit të Rusisë, duke e izoluar vendin nga produktet e tyre, shërbimet dixhitale dhe sistemet. Më poshtë është një listë e kompanive që kanë marrë masa kundër Rusisë, e cila me siguri do të zgjerohet në ditët dhe javët në vazhdim.

 

Apple – Gjiganti i teknologjisë njoftoi se do të pezullojë shitjet e produkteve në Rusi, për shkak të shqetësimit të madh të pushtimit të Ukrainës.

Kompania kufizoi aksesin edhe në shërbimin e pagesave nga celulari Apple Pay dhe disponueshmërinë e aplikacioneve të mediave shtetërore ruse, mes të cilave RT dhe agjencia e lajmeve Sputnik, për shkarkimin e tyre jashtë Rusisë. Si masë sigurie për ukrainasit, Apple çaktivizoi edhe trafikun dhe incidentet në Ukrainë nga Apple Maps.

Google – Kompania eliminoi mediat ruse që financohen nga shteti, mes të cilave RT, nga funksionet që lidhen me lajmet dhe instrumentin e kërkimit Google News. Google u ka hequr të drejtën shërbimeve të mediave ruse që të fitojnë para nëpërmjet Google Ads te faqet e saj web dhe aplikacionet.

Ndër të tjera, ua ka ndaluar mediave shtetërore ruse të përdorin funksionet e Google për të blerë hapësira reklamash dhe për të vënë reklama në shërbimet e Google, si Gmail. Google Pay ka bllokuar institucione të ndryshme financiare ruse nga rrjeti i tij.

Meta –  Rrjeti, i cili zotëron Facebook, Instagram dhe WhatsApp u kufizoi aksesin RT dhe Sputnik brenda BE-së dhe ndaloi mediat shtetërore ruse të shfaqin reklama, ose të fitojnë para në platformat e saj kudo në botë.

Oracle – Gjiganti i software me seli në Teksas tha se “ka pezulluar të gjitha aktivitetet” në Rusi, disa orë pasi Ministria e Transformimit Dixhital të Ukrainës i bëri thirrje shoqërisë në Twitter të ndalte biznesin në Rusi.

YouTube – Faqja për ndarjen e videove, në pronësi të Google, u ka hequr mundësinë kanaleve mediatike shtetërore ruse të fitojnë para nëpërmjet reklamave në video.

Twitter – Rrjeti social ka pezulluar reklamat në Rusi dhe Ukrainë, në mënyrë që të mos shpërqendrojnë vëmendjen nga siguria publike. Ndërkohë, Rusia ka kufizuar aksesin në Twitter.

TikTok – Aplikacioni për video TikTok u ka kufizuar aksesin account-eve të mediave ruse që kontrollohen nga shteti, mes të cilave RT dhe Sputnik në BE.

Netflix – Platforma e streaming ka ndalur transmetimin e kanaleve të televizioneve shtetërore ruse si Channel One në shërbimin streaming, por do të vazhdojë të funksionojë në Rusi.

MIT – Massachusetts Institute of Technology ndërpreu marrëdhëniet me Skolkovo Institute of Science and Technology, universitet rus kërkimi  në Moskë.

TSMC – Kompania më e madhe e gjysmëpërcjellësve në botë, me seli në Tajvan, po ndërpret shitjet e chip-ave në Rusi, duke përfshirë edhe chip-at e markës Elbrus të zhvilluar në vend.

Intel – Prodhuesi amerikan i chip-ave ndërpreu shitjet në Rusi.

AMD – Edhe Advanced Micro Devices i ndali shitjet e chip-ave për kompjuterët në Rusi. Së bashku me Intel, dy kompanitë përfaqësojnë një pjesë të madhe të tregut CPU desktop.

Dell Technologies – Prodhuesi i kompjuterëve u zotua të pezullojë shitjet e produkteve të tij në Rusi dhe Ukrainë, duke premtuar se do të monitorojë nga afër situatën për të përcaktuar hapat e ardhshëm.

Uber – Aplikacioni ride-hailing po distancohet nga shërbimi rus ride-sharing Yandex.Taxi.

Bolt – Startup-i europian i ride-hailing ndërpreu funksionin në Bjellorusi, pasi vendi mbështeti sulmin e Rusisë në Ukrainë. Aplikacioni i saj i dërgesave, Bolt Market, hoqi “të gjitha produktet e prodhuara në Rusi ose të lidhura me kompanitë ruse”.

Snapchat – Rrjeti social tha se nuk do të shfaqë reklama në Rusi, Bjellorusi apo Ukrainë. Kompania ka pezulluar të gjitha shitjet e reklamave në Rusi dhe Bjellorusi.

Viber – Grupi japonez Rakuten, i cili ka në pronësi aplikacionin e mesazheve Viber, tha se do të heqë reklamat nga aplikacioni i tij në Rusi.

Roku – Kompania që prodhon aparatura streaming për TV tha se do të ndalojë kanalin shtetëror rus të lajmeve RT në Europë.

Microsoft – Gjiganti i teknologjisë tha se do të eliminojë të gjitha aplikacionet e mediave shtetërore ruse nga app store i Windows dhe nuk do të lejojë reklamat në faqet web të mediave shtetërore.

Electronic Arts – Prodhuesi i madh i videolojërave tha se do të heqë ekipin kombëtar dhe skuadrat ruse nga lojërat e FIFA. Ai tha se do të heqë edhe ekipin kombëtar rus dhe bjellorus dhe skuadrat e hokej mbi akull në lojën e fundit NHL.

Nokia – Prodhuesi finlandez i pajisjeve të rrjetit njoftoi se do të ndërpresë dërgesat në Rusi, në mënyrë që të respektojë sanksionet e vendosura ndaj vendit.

Ericsson – Kompania suedeze e telekomunikacioneve do të pezullojë dërgesat në Rusi, sipas një komunikimi të brendshëm nga CEO i saj.

/ Rest Of World