Binak Kelmendi: Liria absolute e luftës

Është e sigurt:

Liri ka vetëm në Luftë

Kur llomotit kot për paqe

Ose thua gënjeshtrat më të mëdha

Pasi ke vrarë sa ke mundur

Sa ke dashur

Dhe kënd ke dashur

 

Më së lehti është të vriten fëmijët dhe pleqtë

Si Serbia në Kosovë

Askush nuk të ndalon

Dhe pas gjithë këtyre vrasjeve

Të përdhunosh çdo gjë

 

Edhe macat e sh’pisë

Si ushtarët e Serbisë

 

E të plaçkisësh

Ç’të shohësh e ç’të gjesh

Te të vrarët dhe te të gjallët

Si policët e Serbisë

Duke ua vënë zjarrin shtëpive

Në Kosovë

Me shkrepësën tënde

Marrë nga xhepi plot gjak.

 

Në luftë liri ka sa të duash:

Të ikësh

Të bëhesh refugjat, azilant, apatrid

Ta marrësh lejen e qëndrimit të përhershëm

Për të mos u kthyer më kurrë në atdhe

As me arkivol

Dokumente dhe CV

Djegur në Serbi

Te Danubi

Shumë afër Dra- Kullës

 

Dhe pastaj të premtosh Paqe!