Njihuni me Janja Dora Ivancic!
Adresa e Janjës nuk është për t’u ruajtuar. Po e kërkuat dy herë brenda gjashtë muajsh, nuk do ta gjeni në të njëjtin vend. Vetëm brenda dy vitesh, ajo e ka ndërruar katër herë vendbanimin e saj brenda Vjenës. Janja ka nevojë të lëvizë.
Prindërit e Janjës, tash 25 vjeçe, e mësuan atë që dy gjërat më të rëndësishme në jetë ishin: udhëtimi dhe gjuhët e huaja. Kur njeriu mëson një gjuhë të huaj, nuk mund t’ia marrë kurrkush. Kështu, ajo lindi në Kroaci por ai vend do të mbette për Janjën veç njëra nga adresat e shumta deri tash. Ndër vite, ajo jetoi në Greqi, Slloveni, Egjipt, Shrilankë, Vietnam dhe së fundmi në Vjenë.
Janja studion në degën e Historisë dhe Studimeve të Ballkanit në kryeqytetin vjenez, me fokus në periudhën e antikitetit dhe mesjetës në Ballkan. Që në fillim të studimeve, ajo e pa që i duheshin burime autentike; i duhej të lexonte në gjuhët ballkanike dhe jo përkthime. Kështu nisi edhe udhëtimi i saj drejt gjuhëve ballkanike.
Ndonëse Janja mund të flasë kroatisht, anglisht, gjermanisht, latinisht, dhe disa gjuhë ballkanike; kur erdhi në Kosovë për herë të parë vitin e kaluar, nuk dinte të thoshte as “Mirëmëngjesi” në shqip. Por, ishte një udhëtim dykuptimësh për të dhe sigurisht që ishte e ngazëllyer. Ajo kishte lexuar për rreth dhjetë vjet për historinë e Ballkanit, përkatësisht Kosovës. Kur së pari i kishte vizituar vendet për të cilat kishte lexuar si Fusha e Kosovës, Patrikana e Pejës, Prizreni etj., ajo ishte shkrehur në vaj. Kishte qenë përvojë e veçantë për të. Sytë e saj shkëlqejnë kur ajo flet për këtë.
Nuk na duhet ta pyesim nëse do të kthehet prapë vitin tjetër.
Përgatiti: Gentianë Paçarizi