Atentati me eksploziv në Vlorë, djalit të biznesmenit i presin këmbën

Paraditen e sotme qyteti i Vlorës u trondit nga një shpërthim i fuqishëm eksplozivi, ku një makinë e cila ishte në ecje e sipër u hodh në erë.

Për pasojë mbeti i plagosur rëndë drejtuesi i mjetit, 25-vjeçari Ines Hajrulla, i cili po lufton në spital mes jetës dhe vdekjes.

Mësohet se i riu ka humbur njërën këmbë si pasojë e shpërthimit të fuqishëm, ndërkohë që rrezikohet edhe këmba tjetër.

Hajrulla i cili njihet si person me precedentë të theksuar kriminalë, rezulton se është djali i një biznesmeni të njohur vlonjat.

Hetimet paraprake konfirmojnë se i riu ishte pikërisht shënjestra e atentatit të ndodhur këtë të hënë.

Ngjarja u shënua në lagjen “Hajro Çakërri”, tek Bishti i Kalldrëmit në qytetin bregdetar, ku automjeti shpërtheu në lëvizje, ndërsa më tej vazhdoi lëvizjen për disa metra, deri kur u përplas me një mjet tjetër.

Makina tip “Jeep” me targa AA 298 CL, me drejtues Hajrullaun, shpërtheu gjatë lëvizjes, ndërsa dyshohet se eksplozivi ishte vendosur në pjesën e përparme të tij.

Grupi hetimor ndodhet në vendngjarje dhe po punon për zbardhjen e plotë të rrethanave të ngjarjes.