Albana Shala: LETRA DASHURIE

Mos qeshni me letrat e dashurisë,

që si letra cigaresh mbështjellin

veç lëndë djegëse

Mos qeshni me jetëshkurtrat,

një përdorimshet, të tejdukshmet

në dëshirë përvëluese,

mbledhëse fjalësh – shkarpa

për sy të etur e buzë të thara

karfica gërmash, në pragje ujëvarash

Mos qeshni nëse ju qëllon t’i lexoni

veç lërini t’ju turbullojnë si cigarja e parë

që fëmijët thithin fshehurazi nga paketa e mjeshtrit

Ah erëmirat, ushtarka

të ngarkuara me polen,

në qiellëz pikë pikë troket

ambrosi’ e dashurisë./albspirit.com