Dhurata Lezo: U DESHËM…

 

Hënën sikur e shtrydhi njeri

e ta hodhi ndër sy

nën dritën e saj, sa i bukur ngjake…

ç’u deshëm të dy…

 

Dielli thërrmohet në mijëra drita

e të qëndron mbi buzë

ç’t’u përflakën mollëzat, të bukurat

ç’u deshëm të dy…

 

Blunë e qiellit një dorë e padukshme

ta veshi këmishë në trup

patat e egra fluturuan dridhshëm

ç’u deshëm të dy…

 

…Po unë, ç’paskam kështu i dashur, ç’më djegka malli për ty…

mos eja i trishtë në krahët e mi sonte

që të them ëmbël në buzë:

vërtetë u deshëm të dy…