Mehmetali Rexhepi: MOSHA E KALLINJVE

 

Në 70-vjetorin e ditëlindjes!

 

vizatimet e ditës ishin të rëndomta

por vijnë çastet e thellimit në portretin e vetvetes

vijat dhe ngjyrat marrin trajtën e kallinjve kokrra pjekur

edhe këtë herë kashtë kalliri në këmbë mbetur

ndonjë kokërr e pa shkundur s’ka si piqet shterë e mekur

shtatëdhjetë stinët  hëngrën mbi tryezën e shtruar të blertës

pjekur e papjekur me shije e pashije

lukthi bluante çfarëdo i gatuanin dhëmbët

lukthit të shqisave dendur bluhej athtësi e fjalëve

ndonjë ëmbëlsi nuk e zbuste pelinin

 

*

jam i korrikut

kurdo që i piqem të korrave

le të korrëm sikurse një sinonim i kallirit

përderisa më ndjek hija e diellit

jam udhëve të kërkimit të diçkaje

që ma lejon i vetmi mik jetik

të cilit i vete dhe më vjen pas

mi shkrinë  eshtrat që mi ngrinin hijet e hafijeve

 

*

korriku është dorëzani i kërthizës sime

me të gjitha lakesat e ngarkesave të mia

më vizatoi dhe vijat e hullive

nuk i mbushi me të gjitha ngjyrat e përziera

le të mos jem i ngazëllyer

tashmë për mua  e ka veçse këtë ligj këtë ngjyrë

për çdo ditë më del në pritë:

që nga kërthiza të pikturoja

në galeritë tua pamjet t`i ekspozoja

çfarë më kërkon fare mos e prit

për ty e kam vetëm të grunjtën

dhe pigmente kafeje

në oazën e dikurshme gjithçka të mbeti

kthehu nëse mund ta kalosh moshën e një deti

 

 

 

*

ja si më poqi korriku shpejt

sa shpejt më poqi për shtatëdhjetë vjet

 

Gjilan, më 4 korrik 2021, ora 12. 10.

————————————————-

Mehmetali M. Rexhepi u lind në Gjilan, më 4 korrik 1951. Shkollimin fillor dhe të mesëm, gjimnazin i kreu në Gjilan, më 1971. Studimet me ndërprerje, për shkaqe politike, i mbaroi në Fakultetin Filozofik të Universitetit të Prishtinës, në Degën Albanologji.

Është njëri nga veprimtarët e çiltër për çështjen kombëtare. Nga pushteti jugosllav i Jugosllavisë Federative, në vitet e shtatëdhjeta, të tetëdhjeta dhe të nëntëdhjeta të shekullit njëzet, u burgos, u pushua nga puna dhe nga institucionet e KSA të Kosovës.

Mehmetali Rexhepi asnjëherë nuk iu shmang kërkesave që shtronin rrjedhat e kohës: pajtimit të gjaqeve, veprimtarive “të rrezikshme” ilegale, politike, kulturore-artistike dhe humanitare.

Fushë-veprimtaria e tij ka shtrirje: në arsim e edukim; veprimtari atdhetare, humanitare; si poet, prozator, studiues, kritik letrar e eseist  dhe  në fushën e publicistikës.

Mehmetali Rexhepi ka botuar disa vëllime poetike, dokumentare, kritike dhe eseistike. Ka një mori dorëshkrimesh të pabotuara.

Që nga themelimi i “Flakës së Janarit” në Gjilan, e cila simbolizon flakën e dëshmorëve për liri e çlirim kombëtar, e shpërfaqur përmes veprimtarive përkujtimore, kulturore, letrare-artistike, ishte dhe mbeti krushk besnik i rrugëtimit të saj.

Themeloi dhe udhëhoqi pothuajse një dhjetëvjeçar, në rrethanat e përndjekjes serbe, Klubin Letrar “Rexhep Elmazi” në Gjilan. Po ashtu, ishte njëri  nga themeluesit e SHHB”Nëna Terezë”, dega në Gjilan.

Në konkurset letrare te “Flaka e Janarit”, “Lulëkuqet e Prillit”, e tjera, për prozën e shkurtë është vlerësuar me çmime të para, të dyta dhe të treta.

Gjatë viteve 2009-2012, për një mandat ishte drejtor i Gjimnazit “Zenel Hajdini”, në Gjilan.

Është anëtar i Lidhjes së Shkrimtarëve të Kosovës.