Ndue Ukaj: Gjergj Kastrioti nuk është në zemra të shqiptarëve
Shkrimtari i madh, Gjergj Fishta, më 1914, e shkroi satirën e njohur, “Nën hajat të parrizit”.
Sipas satirës, Shën Pjetëri, në derë të Parrizit, mediton për fatin e shqiptarëve, dhe duke biseduar me Djallin dhe Skënderbeun, ai thotë: “shqiptarët janë çoroditë krejt” dhe “kanë dalë faret”, prandaj as që iu shkon mendja të trokasin në derë të Parrizit, për të kërkuar shpëtimin.
Dhe, sipas autorit, kjo mund të jetë arsyeja pse Shqipëria s’gjen shpëtimin e lumturi.
Në këtë tekst, siç kuptojmë nga dialogu i Shën Pjetërit, shqiptarët janë pre e veseve të këqija, tradhtisë, krenarisë së madh, kopracisë, rrenës, patriotizmit të rremë, adhurimit të gabuar…
Dialogu i Skënderbeut më Djallin përshkohet nga një ton kritik dhe dramatik. Ndërsa kulmi i këtij shpërthimi, është momenti, kur djalli i thotë Skënderbeut se, emri i tij është në libra, por nuk dihet nëse është në zemër të shqiptarëve.
Por bisedën dramatike mes Djallit dhe Skënderbeut e ndërpren Shën Pjetri, i cili thotë: “për inad të Djallit dhe Shqiptarëvet, Zoti ka me mbajtë Shqypninë më kombë me nder e me lumni”.
Sot, po të ishte gjallë Gjergj Fishta, do të na qortonte fort, me kamzhikun e tij të mbrehtë të satirës, duke na thënë: mbajeni Skënderbeun më shumë në zemra sesa në Facebook dhe libra. Këshillojuni nga ai dhe mësoni nga filozofia e tij. Lëne anash hipokrizinë dhe dyfytyrësinë. Mos u anëtarësoni nëpër konferenca që nuk u përkasin juve. Duajeni njëri-tjetrin. Sepse, vetëm kështu, jeni të fortë mjaftueshëm përballë rreziqeve të shumta që u kanosen.
6 maj 2018