AVDUSH CANAJ: NE, TË VEGJLIT

Të rriturit

s’e dinë

pse dielli fle pas malit

pse era ecën pa atlete

pse deti nganjëherë zemërohet

S’e dinë

të rriturit

ku i qepin fustanet fluturat

ku i blejnë xhaketat mollëkuqet

ku rriten përrallat me ngjyra

S’kanë dëgjuar kurrë

për muzikën e luleve

as për pikturat e reve

as për alfabetin e milingonave

Ne, të vegjlit

i dimë të gjitha

edhe gjuhën e zemrave

kur flasin shpesh