Yzedin Hima: Ende nuk i thamë të gjitha

 

ka edhe dhimbje të ëmbla si malli im për ty

në burimet e shterura pritja ka çelur gjemba

imazhet e vajzave që kam dashur dhe i dua

në ditë vetmie i ngre lart në qiell si balona

kapur fort në fijet e kaltra të kujtesës

ende nuk të thashë se dashuria nis kur sytë puthin sytë

përrenjtë janë zemërimi i djemve të sinqertë

nje sorrë nuk zhvesh dot të brendshmet e zeza

për të bërë dashuri me heroin e bronxtë në qytet

mbi dy shina dhimbje rrëshqet treni që të sjell ty

zhvirgjërimi i ngjet rënies së borës së parë

nisemi për rrugë aty ku duam nuk arrijmë kurrë

policët janë engjëj para djajve të padukshëm

që rrugët na i ngatërrojnë në çdo udhëkryq

tundja e bishtit të qenit është më e sinqertë

se të gjitha përshëndetjet elegante në qytet

ende nuk i thamë të gjitha

koha i ngjet lumit

rrjedh dhe nga rruga nuk kthehet kurrë