Cikël poetik nga Avdush Canaj

KËNGA FLUTUROI NË SHI

Dua të më lag pranvera
tha kënga dhe fluturoi në shi
çadra gazit u shkri
në vetull të shkallëve

PËRQAFOI DITËN E QESHUR

Zogu hapi dritarën e librit
Përqafoi ditën e qeshur
Me këngën e violinës magjike

TUNDI RRJETËN E ËNDRRËS

Topi ëndërronte në kopsht
fluturimin te retë

tundi rrjetën e ëndrrës
me dy gola bubullime

Kur ëndrra iku
më zogun e gjumit
sytë i qeshën në duart e barit

PSE IU DRIDH DORA RREZORIT

Zemra më tregoi
pse iu dridh dora Rrezorit
kur ma mikloi gërshetin
në orën e vizatimit

ME CICËRIMA SHKRUAJ NJË LIBËR

Krejt çka flasin drurët
më tregon era
unë pastaj e shkruaj një libër
me cicërima gjethësh

ERA HAPI FLETORËN TIME

Era hapi fletorën time
me gishtin e zymbylit

Donte të dinte
ç’vjershë kam shkruar

Kur e lexoi
i qeshen kaçurelat mbi sy

I tregoi kumrisë
ta këndojë e para
në ballkon të mëngjesit

LOJA FLUTURONTE

Loja s’ndalej, loja.Fluturonte.
Herë si fluturake
herë si sutë e vjershës

Kur u lodh
puhiza ia fshinte djersët e ballit
si motrushja e vogël

S’du të fle shumë, tha,s’dua
sall një grimë të grimës
sërish ta vazhdoj lojën me litar
me lepurishin hopa-hopa

Gjumi s’e pyeti
e zuri në prehër të manushaqes

Kur u zgjua e qeshur si dita
bishtcubi kishte hyrë në përrallë.