GJKKO lë në fuqi arrestin në shtëpi dhe pezullimin nga detyra për Vlora Hysenin
Gjykata e Posaçme kundër Korrupsionit dhe Krimit të Organizuar (GJKKO) ka lënë në fuqi masën e sigurisë “arrest në shtëpi”, si dhe pezullimin nga detyra, ndaj ish-drejtoreshës së SHISH, Vlora Hyseni.
Hyseni u paraqit këtë të enjte në ambientet e GJKKO-së, ku u shqyrtua masa e sigurisë e vendosur ndaj saj në kuadër të hetimeve të SPAK.
E shoqëruar nga efektivë të Policisë, ajo u përball me interesin e mediave gjatë hyrjes në gjykatë. Gazetarët e pyetën për pretendimet lidhur me marrëdhëniet e saj me biznesmenin Ergys Agasi, si dhe për akuzat që lidhen me informacionet e klasifikuara, por Hyseni nuk dha përgjigje.
Pas përfundimit të seancës, ish-drejtoresha e SHISH doli nga ambientet e GJKKO-së pa bërë deklarata për mediat.
Sipas hetimeve të SPAK, ndaj Hyseni janë ngritur dyshime për përkrahje të autorit të një vepre penale dhe për dhënie të informacioneve të klasifikuara.
Hetimet vijojnë, ndërsa vendimi i gjykatës për masën e sigurisë nuk përbën një përcaktim përfundimtar mbi fajësinë e saj.
