Presidenti i Ukrainës: Po kërcënohemi me një luftë të madhe

Presidenti i Ukrainës Volodymyr Zelensky ka lëshuar një deklaratë duke përshëndetur fuqinë e vendit të tij, ndërsa tensionet vazhdojnë të rriten për mundësinë e një pushtimi rus. Udhëheqësi ukrainas tha se kishte dëgjuar raportet e SHBA se Rusia mund të pushtonte të mërkurën, por tha se do ta bënte 16 shkurtin një “ditë uniteti”. “Ne po kërcënohemi me një luftë të madhe dhe data e pushtimit ushtarak është caktuar sërish”, tha Zelensky në deklaratë. “Kjo nuk është hera e parë, por shteti ynë sot është më i fortë se kurrë. Ne duam paqe dhe duam t’i zgjidhim të gjitha çështjet ekskluzivisht përmes negociatave.”

Presidenti vazhdoi të parashikojë se rajonet e Donbass dhe Krimesë do të kthehen në kontrollin e Ukrainës me mjete diplomatike.

Ai vlerësoi ushtrinë e Ukrainës dhe tha se ajo është “shumë herë më e fortë se tetë vjet më parë”.

Zelensky tha se më 16 shkurt “ne do të ngremë flamuj kombëtarë, do të vendosim shirita blu dhe të verdhë dhe do t’i tregojmë botës unitetin tonë”.