Yzedin Hima: Është ditë e diel

Të duash është gjithmonë më mirë se të urresh

më thonë sytë kozmikë të një breshkeje të vogël

teksa përhapnin një dritë qiellore që endej mbi bar

sy të tillë ka vetëm vajza që nuk më deshi kurrë

dhe për fatin tim të keq ajo kurrë nuk më urreu

shihej çdo ditë në sytë e mi si në një qelq të thyer

lumi përpëlitet në sqepin e pulëbardhës në ag

është ditë e diel

burrat në duart e grave sot kanë rënë robër

qielli qiellëzon në dritaret e qytetit

që prehet në krahët e grave.