Cikël poetik nga Avdush Canaj

 

 

POEZITË E DRURËVE

 

Gjethet

bien

bien poezitë e drurëve.

 

Era i lexon

dhe qesh

me muzikën nëpër gishta.

 

Një libër

bën me to

pėr vjeshtën e lirikave.

 

MOTËR E YJEVE

(Variant)

 

Nëpër shkallët e vizatuara

hipi çupëlina hënë,

hipi shpejt e shpejt.

Me një shportë qershi

t`i gëzojë yjet e qiellit

me kapela drite.

 

Dhe ata u ëmbëlsuan,

ia falën nga një puthje,

puthje ylloshe

si për ditën e lindjes.

 

Kur deshi të kthehet

shkallët ia kishte fshirë era!

 

Era, kjo hajneshë e pyllit.

U bë motër e yjeve

edhe përrallë

të na tregojnë gjyshet,

në prehër të gjumit.

 

DËNESTE LOTI

 

Në aeroportin e ndarjes

Dëneste loti.

 

E dëgjova zemrën kur i tha

Prapë vjen motra

Me verën në ballkon.

 

Vjen motra prapë.

 

SHITJE

 

Shes stilografin

për një litër qumësht

e pak bukë.

 

Ngjyrën e jap falas.