Leke Frroku Gazulli: 20 PYETJE PËR KRYEMINISTRIN?
KUSH ËSHTË SHKAKU DHE KUSH ËSHTË PASOJA?
Zoti Kryeministër Edi Rama, mjaft me monologje, propagandë, premtime dhe justifikime! Populli shqiptar dhe rinia nuk i kapërdijnë më këto. Shqiptarët kërkojnë përgjigje, jo fjalime. Kërkojnë drejtësi, jo propagandë. Kërkojnë një shtet që u shërben, jo një pushtet që u kërkon të heshtin!
Sot kam disa pyetje për ju, zoti Kryeministër, dhe dua t’i rendis një për një, sepse pas secilës prej tyre qëndron një problem i rëndë për qytetarët shqiptarë.
1. PËRSE, ZOTI KRYEMINISTËR, Shqipëria, me një nga fushat naftëmbajtëse më të mëdha në Europë, ka çmime të karburanteve ndër më të shtrenjtat në Europë? Përse shqiptarët duhet ta blejnë naftën kaq shtrenjtë, kur vendi i tyre ka pasuri të mëdha naftëmbajtëse?
2. PËRSE, ZOTI KRYEMINISTËR, Shqipëria, një vend ndër më të pasurit në botë për burime të kromit dhe bakrit, vazhdon të ketë paga ndër më të ulëtat në Europë? Ku shkojnë pasuritë e këtij vendi dhe përse qytetarët nuk përfitojnë prej tyre?
3. PËRSE, ZOTI KRYEMINISTËR, në një vend me rreth 320 ditë me diell në vit, bujqësia shqiptare është në një gjendje kaq të rënduar? Përse fermerët braktisin tokat, fshatrat po zbrazen dhe prodhimi vendas nuk mbështetet sa duhet?
4. PËRSE, ZOTI KRYEMINISTËR, pensionistët tanë marrin pensione ndër më të ulëtat në Europë? Përse njerëzit që kanë punuar gjithë jetën duhet të zgjedhin mes bukës, ilaçeve dhe faturave?
5. PËRSE, ZOTI KRYEMINISTËR, një familjeje shqiptare mund t’i duhen 35 vite punë për të siguruar një banesë prej vetëm 60 metrash katrorë? Si mund të krijojë familje një i ri kur blerja e një shtëpie është kthyer në një ëndërr pothuajse të paarritshme?
6. PËRSE, ZOTI KRYEMINISTËR, Shqipëria, një shtet kaq i vogël, përmendet vazhdimisht për trafikimin ndërkombëtar të drogave të forta dhe të lehta? Përse vendi ynë duhet të identifikohet me krimin dhe trafikun, në vend që të identifikohet me zhvillimin dhe mirëqenien?
7. PËRSE, ZOTI KRYEMINISTËR, nuk u hiqet imuniteti deputetëve të mazhorancës kur SPAK kërkon autorizim për masa ndaj tyre lidhur me akuza për korrupsion dhe pastrim parash? Përse politika duhet të krijojë pengesa për drejtësinë? A janë deputetët mbi ligjin?
8. PËRSE, ZOTI KRYEMINISTËR, kushtet e studentëve shqiptarë janë kaq të mjerueshme? Përse nuk subvencionohen dhe nuk mbështeten studentët sa duhet, ndërkohë që Kosova, shteti më i ri në Europë, ka ndërmarrë masa konkrete për mbështetjen e tyre? Përse rinia shqiptare duhet të largohet nga vendi për të ndërtuar të ardhmen?
9. PËRSE, ZOTI KRYEMINISTËR, në Shqipëri ngrihen vazhdimisht shqetësime për koston e ndërtimit të rrugëve, që në disa projekte pretendohet se arrin deri në pesëfishin e kostove në vende të zhvilluara europiane? Përse nuk bëhet transparencë e plotë për çdo kilometër rrugë dhe çdo euro të shpenzuar?
10. PËRSE, ZOTI KRYEMINISTËR, pas 35 vitesh vazhdojmë të flasim për ujë, drita dhe rrugë? Përse ende ka familje shqiptare që vuajnë nga mungesa e furnizimit të rregullt me ujë, energji elektrike dhe infrastrukturë rrugore? Në cilin shekull po jetojmë?
11. PËRSE, ZOTI KRYEMINISTËR, në spitalet shqiptare mungojnë ilaçet dhe qytetarët ankohen se, nëse nuk paguajnë, nuk marrin shërbimin e duhur? Përse shëndeti dhe jeta e qytetarit duhet të varen nga paratë që ka në xhep?
12. PËRSE, ZOTI KRYEMINISTËR, në shkollat shqiptare ka mungesë ngrohjeje dhe ende zhvillohet mësim me dy turne? Përse fëmijët tanë nuk kanë kushte dinjitoze për t’u arsimuar?
13. PËRSE, ZOTI KRYEMINISTËR, sistemi i drejtësisë në Shqipëri vazhdon të përballet me probleme të rënda? Përse qytetarët presin me vite, madje në disa raste me dhjetëra vite, për të marrë një vendim gjykate të formës së prerë? Përse ka kaq shumë ankesa për vendime të padrejta? A mund të quhet drejtësi një sistem ku qytetari pret një jetë të tërë për të marrë të drejtën e tij?
14. PËRSE, ZOTI KRYEMINISTËR, rriten pagat e deputetëve, gjyqtarëve dhe prokurorëve, ndërkohë që pagat e policëve dhe pensionet nuk rriten në të njëjtën masë? Përse një polic që rrezikon jetën për sigurinë e qytetarëve nuk duhet të paguhet me dinjitet? Përse pensionistët duhet të mbeten gjithmonë të fundit?
15. PËRSE, ZOTI KRYEMINISTËR, vazhdojnë konfliktet, abuzimet dhe pretendimet për grabitjen e pronave në Shqipëri? Përse qytetarët duhet të kalojnë dekada nëpër gjykata për të mbrojtur pronën e trashëguar nga të parët e tyre?
16. PËRSE, ZOTI KRYEMINISTËR, administrata shtetërore është mbushur, sipas denoncimeve të shumta, me patronazhistë dhe militantë të partisë suaj? Përse punësimi në shtet duhet të ndikohet nga përkatësia politike dhe jo vetëm nga merita, profesionalizmi dhe aftësia?
17. PËRSE, ZOTI KRYEMINISTËR, nuk realizoni një reformë zgjedhore me lista 100% të hapura? Përse qytetarët nuk duhet të kenë të drejtën të zgjedhin drejtpërdrejt çdo deputet që do t’i përfaqësojë në Parlament? Përse kryetarët e partive duhet të kenë kaq shumë pushtet mbi përbërjen e Kuvendit?
18. PËRSE, ZOTI KRYEMINISTËR, nuk e çoni vendin në zgjedhje, nëse jeni kaq i bindur se populli ju mbështet? Përse nuk i hapni rrugën një qeverie teknike që të përgatisë zgjedhje të lira, të ndershme dhe transparente? Përse keni frikë t’ia ktheni fjalën sovranit?
19. PËRSE, ZOTI KRYEMINISTËR, qytetarët vazhdojnë të kërkojnë përgjigje se përse të korruptuarit dhe kriminelët nuk marrin gjithmonë ndëshkimin që meritojnë sipas ligjit? Përse pandëshkueshmëria vazhdon të perceptohet si një nga problemet më të mëdha të shtetit shqiptar?
20. PËRSE, ZOTI KRYEMINISTËR, nuk reflektuat përballë protestës së qytetarëve dhe rinisë që, për 135 ditë, sipas organizatorëve, protestuan paqësisht dhe u bënë simbol i një proteste model? Përse nuk dëgjuat kërkesat e tyre? Përse zgjodhët monologun në vend të dialogut?
ZOTI KRYEMINISTËR, JA KU I KENI SHKAQET E PROTESTËS!
Mos kërkoni shkaktarë të tjerë!
Mos fajësoni rininë!
Mos fajësoni popullin!
Mos i trajtoni protestuesit si armiq të shtetit!
Populli nuk është armiku i qeverisë. Populli është sovrani dhe qeveria duhet të jetë në shërbim të tij!
Për 135 ditë, qytetarët dhe rinia kanë protestuar paqësisht, sipas organizatorëve, duke dhënë një shembull të qëndresës qytetare. Por ju, zoti Kryeministër, nuk reflektuat.
Ju vazhdoni me monologje, ndërsa qytetarët kërkojnë përgjigje.
Ju flisni për suksese, ndërsa pensionistët numërojnë monedhat për të blerë ilaçet.
Ju flisni për zhvillim, ndërsa të rinjtë largohen nga Shqipëria.
Ju flisni për drejtësi, ndërsa qytetarët presin me vite në dyert e gjykatave.
Ju flisni për mirëqenie, ndërsa familjet shqiptare përballen çdo ditë me çmime të larta dhe paga të pamjaftueshme.
ZOTI KRYEMINISTËR, NJË QEVERI NUK MATET ME BUKURINË E FJALIMEVE TË SAJ, POR ME JETËN QË U SIGURON QYTETARËVE!
Nëse e doni këtë vend qoftë edhe sadopak, nëse ju ka mbetur sadopak përgjegjësi politike dhe moral përpara shqiptarëve, JEPINI DORËHEQJEN!
Hapini rrugën një zgjidhjeje demokratike, një qeverie teknike dhe zgjedhjeve të lira e të ndershme.
Shqipëria nuk është pronë e asnjë kryeministri, asnjë partie dhe asnjë grupi pushtetarësh.
Shqipëria është e shqiptarëve!
Shqipëria është e rinisë!
Shqipëria është e brezave që do të vijnë!
ZOTI KRYEMINISTËR, SHKAKU JENI JU DHE PASOJAT POLITIKE DO T’I MBANI JU!
Koha do të tregojë, ashtu siç ka treguar historia, se asnjë pushtet nuk është i përjetshëm.
Asnjë qeveri nuk mund ta zëvendësojë vullnetin e popullit.
Asnjë kryeministër nuk është mbi Kushtetutën dhe ligjin.
ASNJË PUSHTET NUK ËSHTË MBI POPULLIN!
POPULLI KËRKON LLOGARI! RINIA KËRKON TË ARDHMEN! SHQIPËRIA KËRKON NDRYSHIM!
