Ikën tjetër kandidat nga lista e Lulzim Bashës

Kryetari i Partisë Demokratike Lulzim Basha duket se dalëngadalë po ngel krejt i vetëm brenda partisë që drejton. Pas reagimit të deputetëve Jozefina Topalli dhe Arben Imami, një tjetër emër i rëndësishëm për PD-në ka sulmuar Bashën duke i quajtur fyese për partinë e tij lëvizjet politike të Bashës. Kryetari i Partisë Lëvizja e Legaliteti, Sulejman Gjana ka deklaruar sot dorëheqjen e tij nga kandidimi në zgjedhjet e 25 qershorit në listat e Partisë Demokratike. I renditur nga Basha i 4-ti në listën e PD-së në Qarkun e Dibrës, Gjana thonë se me këtë pozicionim kryedemokrati jo vetëm e ka fyer atë personalisht por edhe i ka fyer partinë që ai drejton, PLL.

DEKLARATA E PLOTË

Të dashur miq,

Ju njoftoj se dje në mëngjes lajmërova Kryetarin e Partisë Demokratike z. Lulzim Basha se, nuk e pranoj renditjen e emërit tim në vendin e katërt të listës së PD në Qarkun e Dibres.

Këtë vendim e mora pasi të shtunën zhvilluam një mbledhje të kryesisë të PLL, pas shumë konsultimesh me miq e dashamirës të mi dhe të Legalitetit, por edhe pas një reflektimi të thellë mbi realitetin e ri që krijoi marrëveshja Basha-Rama dhe perspektiva e maxhorancës dhe opozitës së ardhshme.

Fakti që unë kam bindjen se pluralizmi politik në Shqipëri është në rrezik dhe se vlerat dhe kauzat e përqafuara dhe mishëruara prej dekadash nga PLL nuk mund të jenë objekt pazaresh meskine e të cilat nuk lejoj që të nëpërkëmben prej askujt, më përforcojnë qëndrimin tim se as Legaliteti dhe as unë nuk mund të shërbejmë si garniturë apo fasadë.

Për më tepër, renditja e kryetarit të PLL në pozicionin e katërt të listës së PD në Qarkun e Dibres, jo vetem që ështe e padenjë dhe fyese për mua personalisht dhe PLL, por është edhe një tregues i qartë se PD nuk e dëshiron prezencën e PLL në Parlament as zërin e shtresave që ne përfaqësojmë, dhe si rrjedhojë as edhe bashkëpunimin me ne.

Besoj se legalistët dhe simpatizantët e PLL do të kuptojnë siç duhet thelbin e vendimit tim që, në vazhdim, do të sqarohet më gjerësisht nga unë por edhe me një deklaratë politike të PLL.
I juaj përzemërsisht,
Sulejman Gjana
Kryetar i PLL