Postimi në “Twitter” që zhduku 580 milionë dollarë brenda ditës

Postimet në “Twitter” mund të duken të padëmshme për njerëzit normalë, por jo kur je themeluesi dhe kreu i një kompanie të rëndësishme ndërkombëtare.

Pasi ishin hapur fjalë që “Tesla”, kompania që prodhon makina elektrike, do të bashkëpunonte me “Samsung SDI” për prodhimin e baterive të modelit të saj të ri, themeluesi i saj, Elon Musk, sqaroi në Twitter që nuk do të bashkëpunonin me “Samsung SDI”, por me “Panasonic”.

Aksionerët që kishin investuar tek “Samsung SDI” u tërhoqën dhe vlera e kompanisë ra në mënyrë të tmerrshme në bursë, duke humbur 580 milionë dollarë brenda 24 orësh. Ndërsa “Panasonic” u rrit me 800 milionë dollarë brenda të njëjtës kohë.

Themeluesi i “Tesla” u përpoq ta zbusë dëmin me një postim tjetër duke thënë që “Tesla” do të bashkëpunonte me “Samsung” për pajisje të tjera shtëpiake, por investuesit duken të bindur që e ardhmja është tek makinat elektrike.

Musk pritet të hapë së shpejti fabrikën “Gigafactory” (foto 2) e cila do të prodhojë bateri për modelin “Tesla 3”. Kjo fabrikë jo vetëm që do të funksionojë me energji të rinovueshme, por edhe pjesët e “Tesla-s” do të jenë të riciklueshme.