Mesila Doda: Ja disa propozime për zgjidhjen e krizës
“Na duhet një pakt kombëtar për reformën zgjedhore, një pakt kombëtar për integrimin e vendit dhe një pakt kombëtar për reformën në drejtësi”- është shprehur deputetja.
Takimi në Sukth u organizuar me simpatizantë dhe përkrahës të kësaj force politike dhe kryetari i PDIU-së në Durrës, Krenar Lesko.
Ndër të tjera deputetja theksoi se janë bërë disa propozime nga ana e PDIU-së për të cilat janë tashmë në dijeni personat e duhur për marrjen në konsideratë të tyre.
“Cili janë propozimet që ne bëjmë? PDIU propozon që Drejtori i Policisë dhe gjithë zinxhiri drejtues i policisë, të jenë persona teknikë dhe të jenë të vendosur me konsensus të plotë nga të gjitha palët. Ky është propozimi ynë i parë për të rritur shkallën e sigurisë për zgjedhjet e ardhshme. Ne kemi propozuar edhe që një grup prokurorësh të instalohet pranë Komisionit Qendror të Zgjedhjeve, të evidentojë çdo shkelje të fushatës zgjedhore dhe gjatë numërimit të votave. Rreth 500 mijë vota prodhojnë 0 deputetë, kjo sepse dy partitë e mëdha kanë rënë dakord që ti ndajnë mes tyre këto vota dhe të prodhojnë mandate shtesë për veten e tyre. Ky sistem zgjedhor ka prodhuar 7 mandate shtesë për një forcë politike dhe 9 mandate shtesë për forcën tjetër. Kjo është vjedhja që i bëhet qytetarëve të Shqipërisë ditën për diell. Prandaj ne duhet ta thyejmë këtë pakt kriminal, me qëllim që ne të hyjmë të lirë në procesin zgjedhor dhe të kemi mundësi që secili të marrë përfaqësuesit e vet në Parlamentin e Shqipërisë, sipas rezultateve. Propozimi tjetër i PDIU-së është ndryshimi i sistemit zgjedhor, jo koalicioneve parazgjedhore, koalicioni të bëhet pas zgjedhjeve dhe një sistem proporcional me një zonë zgjedhore, sepse Shqipëria meriton të jetë një zonë zgjedhore, nuk ka arsye pse të ndahemi në 12 zona. Kjo është një mundësi e mirë për të hyrë në Parlament dhe për të paraqitur në mënyrë dinjitoze votën e qytetarëve, por mbi të gjitha të kemi mundësi që të sjellim një Parlament të drejtë ku vota e qytetarëve vlerësohet në mënyrë të barabartë”,- u shpreh Mesila Doda.