Vera Kurti: Po ‘vjen’ dita juaj…2 Prilli

 

 

Po ‘vjen’ dita juaj…2 Prilli

Po afron dita jote, Autizëm

kush e kush më parë

të gjithë në garë

të veshë emrin tënd për këmishë

ah, pa prekur në lëkurën e mishtë

nuk bëhet fjalë për shpirt…

 

Po vjen dita juaj, engjëj

politikanët, kumbarët tuaj

të rinj e të vjetër,

të sotëm e të djeshëm

sa herë vjen ditë-emri juaj

kapërdisen podiumeve

xhelozojnë të bëhen humanistë

guxojnë të përmendin edhe

emrin e të shenjtës, Nënë-Terezë.

 

Mjekët, më të pafajshëm se ju

fshihen pas vaksinave;

ua kanë frikën zërit të tyre

kërkuesit shkencorë po ashtu,

humbën tuneleve të errta të kërkimeve

pa dalje, pa krye…

 

Psikologët,

zotat e tokës ku ju banoni,

janë shtuar

mezi presin të lexojnë lajmet

se numri juaj është shumëfishuar

nuk kanë faj;

duhet të mbijetojnë

në botën e barkut të parasë,

që rritet çdo ditë,

njerëzit duke kafshuar…

 

Po vjen dita juaj, engjëj

perëndia ju, ju gjeti

të zbusni botën e egër?!