Sali Bashota & Milazim Krasniqi: In memoriam Basri Çapriqi
Është mbresëlënëse kjo dashuri kolegësh, poetësh e profesorësh të Universitetit të Prishtinës. Milazim Krasniqi dhe Sali Bashota përjetësojnë me poezi mikun dhe kolegun e tyre të Universitetit, Basri Çapriqi që disa muaj më parë u nga nga jeta në moshën 58-vjeçare.
S’KE ME DALË NGA PARAJSA
(Mikut e poetit Basri Çapriqit)
Nuk ke me ikë kurrë më nga pika e ujit
As kur çmenden valët e detit
Asnjë pulëbardhë nuk do ta bartë mbi shpinë
Ëndrrën trishtuese të natës
Matanë vetmisë e këndej pikëllimit
Nuk ke me ikë kurrë më nga gjuha e zjarrit
Asnjë bimë e egër
Nuk do të thahet nga kripa e lotëve
Në asnjë stinë të vitit
As kur piqen e bien në tokë ullinjtë
Në ullishtat e Krythës së Ulqinit
As kur shtegtarët presin me dritë ndezur
Buzë gjirit të qetësisë
Se vetëm gjumi ty të ka zënë
Duke prekur dhimbjen mbi barin e fjetur
Nuk ke me ikë kurrë më nga vetmia e stuhisë
Shpirti yt pushon i qetë në tokën e Prishtinës
Në krahun e djathtë të Ali Podrimjes
Të dy u lexoni poezi të amshuarve
Poetët nuk vdesin më pate thënë
Kur u takuam për herë të parë
Në amfiteatrin e Fakultetit Filozofik
Atëbotë secila ëndërr e kishte ankthin e vet
Nuk ke me ikë kurrë më në fund të udhëtimit
Asnjë ditë nuk do t’i ngjajë durimit tënd
Në fillim të vjeshtës kur i shkundnim ullinjtë
Që na piknin çdo ditë mbi kokë
Për Zotin më vete e merrnim çastin e parë të lumturisë
Këndej dashurisë e matanë qirinjve të fikur
Ti njëmend thoshe të qërohen trangujt
Se na plasi inati për lëvozhgën e fatit të tyre
Të mos na zihet fryma nga liria
As të dielen kur lëshove ofshamën tënde të fundit
Nuk ke me ikë kurrë më nga zemërimi i shiut
Teksa zbrazej dhoma nga e fryma e thatë
Dhe të fluturonin të gjitha dallëndyshet
Si nëpër det si nëpër tokë si nëpër qiell
Ti po nisesh këmbë në mbrëmjen poetike
Në Kullën e Balshajve
Pa trembur asnjë zog të bardhë
Në jastëkun me pupla të zeza
Pa trembur asnjë flutur në dhomë
Një ditë para ditëlindjes tënde
Prapë pëshpërite poetët nuk vdesin
Për herë të fundit në kafenenë Simfoni
Sikur ta dinim se nuk ke me dalë nga parajsa
Sali Bashota
2 prill 2018
EDHE KALATË BIEN
(Sonet për mikun e poetin Basri Çapriqin)
Ku t’u tret ajo dashni e madhe për jeten,
Hoqe dorë si prej një çaji të ftohur.
Të mbeten veç ëndrrat, si pamjet që mbeten
Kur udhëton me tren një visi t’panjohur.
Të njihja më të fortë, kala të Ulqinit,
Kur të pashë duke u dridhur si ferishte,
Teksa kaluam gjashtë rrathët e shpëtimit
Të veshur bardhësi në Mekën e ndritshme.
Po edhe kalatë bien, i dorëzohen gjëmës,
Kur u vjen koha të shndërrohen në tuma,
Në një aso fatthëne nuk mjafton përpjekja.
Në varrim e kuptova se ti i ngjaje nënës,
Ngrinte buzë varrit e thyer si Ajkuna,
Më enigmë se jeta, më mister se vdekja.
Milazim KRASNIQI
24 shkurt 2018