Viron Kona: Dikut buzët më s’i dhembin

 

            Gazmore

 

-Diku na kanë ardhur miq,

merr gërnetën dhe shko bjeri!

-M’dhembin buzët, miqtë e mi,

jam keq, oh, unë  i  mjeri!

 

Njëri lutu, tjetri lutu,

ai ngrihet me përtesë,

gër e gër gërnetës, Diku,

sikur bën kafe ekspres.

 

-Jua thashë, o miqtë e mi,

me këto buzë s’i bie dot,

po s’u gjet ilaçi i duhur,

s`do të ketë aheng sot.

 

Befas ngrihet krye miku,

mijëshen “ustait” n’ballë,

seç u drodh gërnet’ e Dikut,

si motori kur i jep gaz.

 

Qejflinjtë radhë e pa radhë,

hedhin mijëshet gjithë lezet,

kartëmonedhat fluturojnë,

gërneta po buçet.

 

Vallja rreth e rrotull vjen,

muzika ndez gjithë vendin,

s’është parë aheng si ky,

Dikut buzët më s’i dhembin.

 

1). Gërnetë është emri popullor i  klarinetës, pra është i njëjti instrument, që thirret me dy emra. Në dasma, gërnetaxhiu, me tingujt e  gërnetës shpreh gëzim, në ceremonitë mortore shpreh hidhërim.