Vera Kurti: Gri-ngjyra e vitit

 

 

Gri më panë sytë

edhe dje,

edhe pardje,

edhe sipardje

gri,

me picrra vezulluese të gënjeshtërta

edhe sot

gri, sapo dal nga pragu i derës

gri dy ketrushët përqafuar me trungun e pemës

gri, dhe rruga për te dera e shpirtit

bëj të trokas dhe dëgjoj pëshpërima të buta;

-këtu hyhet vetëm nëse je veshur me nuancat e ylberit të buzëqeshjes

 

Bëj të buzëqesh dhe më ngrin buzëqeshja

avujve të ftohtë të grisë

që më rrethon ngado

që hedh sytë

 

Mbyllet qarku me grinë

dhe s’ka ngjyrë tjetër

që ia merr kurorën e argjendtë

me kohë shpallur

prej dhimbjes së shpirtit

-ngjyra gri-ngjyra e vitit…