Ina Arapi: In memoriam Arben Xoxa!
Dhimbje e madhe për mua sot. Është ndarë nga jeta Arben Xoxa, djali i shkrimtarit të shquar Jakov Xoxa. Jemi rritur në të njëjtin oborr te Pallatet ‘Agimi’. Ishim kushërinj nga nënat, të largët, por na bashkonte një dashuri e jashtëzakonshme. Gjyshja ime Andromaqi e respektonte dhe e donte shumë familjen e burrit, prej së cilës rridhte dhe teta Dhurata, nëna e Benit. Ajo bashkë me xhaxhi Jakovin kishin qenë studentë në Sofje bashkë me Fatosin. Beni e trashëgoi si askush nga ne fisnikërinë dhe edukatën e përkryer të familjes Tako. U takuam për herë të fundit kur pritëm ngushëllime për vdekjen e tim eti dhe u gëzova shumë se kisha kohë pa e parë.
U prehsh në paqe Beni, do mbetesh përgjithmonë në zëmrat tona si modeli i njeriut të përkryer!
Arben Xoxa lindi në Tiranë më 1 maj 1952, djali i Dhurata dhe Jakov Xoxa. Studioi gjuhë-letërsi dhe u specializua si kritik arti, gjithmonë me rezultate të shkëlqyera. Më pas punoi për shumë vite si pedagog në Universitetin e Tiranës, drejtues në Ministrinë e Arsimit, Akademinë e Shkencave, RTSH dhe më pas prej vitit 1996 si Drejtor i Shtëpisë Botuese Enciklopedike, duke i qëndruar pranë dashurisë së tij më të madhe profesionale, librave. Që në rini e deri vonë ishte i angazhuar në shtypin vendas dhe të huaj, duke botuar qindra shkrime dhe studime, dhe i mirënjohur si një prej personaliteteve të spikatura të mendimit kritik shqiptar. Gjithmonë patriot, gjatë viteve të fundit u tërhoq nga shtypi dhe iu përkushtua botimit të veprave ndriçuese mbi historinë dhe çështjen shqiptare. Homazhet do te zhvillohen te henen ora 10.00 prane Akademise se Shkencave tek Biblioteka!